मनहरी । मकवानपुरको मनहरि गाउँपालिकाभित्रका १९ सामुदायिक विद्यालयका प्रधानाध्यापकले संयुक्त रूपमा राजीनामा दिएका छन् । राजीनामा दिनेहरूमा मनहरि गाउँपालिकाभित्र रहेका १८ प्राथमिक र एक माध्यमिक विद्यालयका प्रधानाध्यापकहरू छन् ।

प्रधानाध्यापकहरूको सामूहिक राजीनामा साउन १ गतेदेखि लागु हुने गरी दिइएको पत्रमा उल्लेख छ । “सहमतिविपरीतको सरुवा सजाय हो भन्ने महसुस गरी यो अन्योलको परिस्थितिले हामी सामुदायिक विद्यालयमा कार्यरत प्रधानाध्यापकलाई काम गर्ने मनोबल कमजोर भइरहेको परिस्थिति छ,” राजीनामापत्रमा उल्लेख छ ।

विद्यालयको गुणस्तर सुधारको नाममा गाउँपालिकाले बिनाकारण प्रधानाध्यापकको सरुवा गर्न खोजेपछि सामूहिक रूपमा राजीनामा दिन बाध्य भएको बताइएको छ । एक प्रअका अनुसार प्रधानाध्यापकबाट राजीनामा दिए पनि पढाउन छाडिने छैन ।

यता, मनहरी गाउँपालिकाका अध्यक्ष रञ्जन कालाखेतीले भने गाउँपालिकाले गरेको सरुवाको निर्णयमा धेरै प्रधानाध्यापक सहमत भइसकेको बताए । शिक्षक महासंघका अध्यक्ष नवराज डोटेलले विषयलाई राजनीतिकरण गराएर अनावश्यक बखेडा झिक्न खोजेको जिकिर उनले गरे ।

“अहिले सार्वजनिक गरिएको राजीनामा करिब १० दिनअगाडिको हो । हामी गाउँपालिकाको शिक्षा र स्वास्थ्य क्षेत्रको सुधार अभियानमा छौँ । प्रधानाध्यापकलाई सकेसम्म आपसी समझदारीमा सरुवा हुनुहोस् भनेका हौँ । उहाँहरूले नमानेपछि हामीले सरुवा गर्न खोजेका हौँ,” अध्यक्ष कालाखेतीले स्पष्ट पारे ।

पालिकाको शिक्षा क्षेत्र सुधारका लागि पालिकाले शिक्षकलाई प्रत्येक महिना तलब खुवाउने, उत्कृष्ट शिक्षकलाई पुरस्कार र सम्मान गर्ने, प्रधानाध्यापक भत्ता ५०० बाट बढाएर दुई हजार रुपैयाँ पुर्‍याउने अभियानमा रहेको कालाखेतीले जानकारी दिए ।

“शिक्षा क्षेत्र सुधार्ने विषयमा सबैको साथ आवश्यक छ । यो गाउँपालिकाको शिक्षा समितिले गरेको निर्णय हो । सकेसम्म आपसी समझदारीमै सरुवा हुन समय दिनेछौँ । तर, कसैले मान्दिनँ भन्छ भने हामी कानुनानुसार अघि बढ्नेछौँ,” अध्यक्ष कालाखेतीले भने । रासस