काठमाडौं । प्रमुख प्रतिपक्ष दल नेकपा (एमाले)ले प्रधानमन्त्री पुष्पकमल दाहाल ‘प्रचण्ड’को राजीनामाको ‘बटमलाइन’बाट पछि नहटेको जनाएको छ ।

प्रतिनिधिसभामा एमालेका प्रमुख सचेतक पदम गिरीले आज प्रधानमन्त्रीको जवाफ सुन्ने र चित्तबुझ्दो नआए संसद् बैठकलाई अघि बढाउन नदिइने बताए । प्रधानमन्त्रीले रोस्ट्रमा उभिएर गल्ती स्वीकार गरी माफी मागे मात्र बैठकका काम–कारबाही अघि बढाउन दिइने उनको भनाइ छ ।

आजको बैठकमा पनि एमाले प्रधानमन्त्रीको राजीनामाको मागसहित उपस्थित हुने उनले जानकारी दिए ।

“आज पनि हामी राजीनामा माग गरेरै सदनमा प्रस्तुत हुन्छौँ । प्रधानमन्त्रीले सदनमा आफ्नो विषय राख्नुहुन्छ । त्यो विचार स्वीकार्य हुन सके मात्र सदन अघि बढ्न हामी सहमत हुन्छौँ,” गिरीले बाह्रखरीसँग भने, “चित्तबुझ्दो नभए सदन चल्दैन । प्रधानमन्त्रीको कुरा सुनिसकेपछि मात्र निर्णय गर्छौँ । त्यो गल्ती थियो भनेर माफी माग्नुभयो भने एकपटकलाई कन्सिडर गर्न सकिन्छ ।”

उनले प्रधानमन्त्री प्रचण्डले सदनमा बोलिसकेपश्चात् मात्र एमाले निर्णयमा पुग्ने बताए ।

केही दिनअघि प्रितम सिंहको पुस्तक विमोचन कार्यक्रममा प्रधानमन्त्री प्रचण्डले नेपालमा भारतको चाहनामा सरकार बन्ने आशयको अभिव्यक्ति दिएका थिए । उक्त अभिव्यक्तिका विषयमा एमाले सांसदले संसद् बैठक अवरोध गरिरहेका छन् । एमालेले प्रधानमन्त्रीको राजीनामा माग गर्दै प्रतिनिधि र राष्ट्रियसभा दुवै बैठक चल्न दिएको छैन ।

सत्तासाझेदार दल नेपाली कांग्रेसका प्रमुख सचेतक रमेश लेखकले भने प्रधानमन्त्री प्रचण्डले बैठकमा सम्बोधन गर्ने र संसद् सञ्चालन गर्ने सहमति भएको जानकारी दिएका छन् ।