काठमाडौं । नेपालका कारागारमा अहिले नेपाली र विदेशी गरी कूल २७ हजार ६७७ जना कैदीबन्दी रहेका छन् । कूल कैदीबन्दीमा पुरुषको संख्या २६ हजार २३४ र महिलाको संख्या एक हजार ४४३ रहेको छ । 

“नेपालका विभिन्न कारगारमा रहेका कैदीबन्दीमध्ये २६ हजार ३३० जना नेपाली र १ हजार ३४७ जना विदेशी छन्,” कारागार व्यवस्थापन विभागका निर्देशक तथा प्रवक्ता कमलप्रसाद पाण्डेले बाह्रखरीसँग भने । 

विभागका अनुसार देशका विभिन्न स्थानमा रहेका सुधार गृहमा एक हजार ११४ जना बालबालिका रहेका छन् ।  सुधार गृहमा रहेकामध्ये कैदी बालबालिकाको संख्या ५५७ र थुनुवा बालबालिकाको संख्या ५५७ रहेको छ । 

नेपालका कारगारमा भारतीय, भुटानी, जाम्बियन, पाकिस्तानी, बोलिभियन, अमेरिकन र क्यानडियन गरी सात विदेशी राष्ट्रका नागरिक पनि कैदीबन्दीको रुपमा रहेका छन् । 

कारागारमा रहेका विदेशी कूल कैदीबन्दीको संख्या एक हजार ३४७ रहेको छ।  प्रवक्ता पाण्डेका अनुसार नेपालका कारगारमा रहेका विदेशी कैदीबन्दीमा सबैभन्दा ठूलो संख्या भारतीयको छ । 

२०८० जेठ मसान्तसम्म नेपालका कारागारमा रहेका भारतीय कैदीबन्दीको संख्य एक हजार २९५ पुगेको छ ।  भारतीयपछि नेपाली कारागारमा सबैभन्दा बढी विदेशी कैदीबन्दीमा भुटानी रहेका छन् । अहिले ४७ जना भुटानी नगारिक नेपालका कारागारमा छन् । 

कारागारमा रहेका अन्य विदेशी कैदीबन्दीमा जाम्बियन, पाकिस्तानी, बोलेभियन र अमेरिकन एक–एक जना छन् ।  नेपाल र भारतबीच खुला सीमा भएका कारण नेपालमा अपराध गर्ने भारतीयको संख्या ठूलो भएको बुझाई प्रवक्ता पाण्डेको छ । कारागारमा रहेका भारतीयमध्ये धेरै लागूपदार्थ ओसारपसार मुद्दामा दोषी देखिएकाहरु छन् ।