काठमाडौं । परराष्ट्रमन्त्री एनपी साउदले अजरबैजानका राष्ट्रपति इल्हाम हैदर ओग्लु अलीयेवसँग शिष्टाचार भेट गरेका छन् । अजरबैजानको बाकुमा उनीहरूबीच भेटवार्ता भएको हो ।

परराष्ट्रमन्त्री साउद असंलग्न राष्ट्रको मन्त्रीस्तरीय बैठकमा सहभागी हुन बाकु गएका हुन् । असंलग्न राष्ट्रको मन्त्रीस्तरीय बैठक सफलतापूर्वक सम्पन्न गरेकामा उनले अजरबैजानका राष्ट्रपतिलाई बधाई दिए ।

भेटमा दुई देशबीचको सम्बन्ध थप मजबुत बनाउने, आपसी हित र बहुपक्षीय सहकार्यका विषयमा छलफल भएको परराष्ट्र मन्त्रालयले जनाएको छ ।

बिहीबारै बाकुमा परराष्ट्रमन्त्री साउद र माल्दिभ्सका विदेश राज्यमन्त्री अहमद खलेलबीच भेटवार्ता भएको छ । भेटमा आपसी हितका विषयमा छलफल भएको थियो ।