काठमाडौं । पछिल्लो नौ महिनामा १३ खर्ब नौ अर्ब ५३ करोड २८ लाख रुपैयाँबराबरको वस्तु आयात भएको छ । भन्सार विभागले सार्वजनिक गरेको पछिल्लो विवरणअनुसार गत वर्षको नौ महिनाको तुलनामा १२.१८ प्रतिशत आयात बढेको हो । अघिल्लो वर्षको चैतसम्म ११ खर्ब ६७ अर्ब ३६ करोड रुपैयाँबराबरको वस्तु आयात भएको विभागको तथ्यांक छ ।

यस्तै, ९ महिनामा एक खर्ब ८८ अर्ब १९ करोड रुपैयाँबराबरको वस्तु निर्यात भएको विभागले जनाएको छ । यो अघिल्लो आर्थिक वर्षको नौ महिनाको तुलनामा ६५.१६ प्रतिशत बढी हो । अघिल्लो वर्षको सोही अवधिमा एक खर्ब १३ अर्ब ९४ करोड रुपैयाँबराबरको वस्तु निकासी भएको विभागको तथ्यांकले देखाउँछ । विभागका अनुसार, नौ महिनामा सोयाबिन, सनफ्लावर तेल, अलैची, टेक्सटाइल, फलामजन्य सामग्री बढी निर्यात भएको छ ।

निर्यातमा केही वृद्धि भएता पनि आयात उच्च हुँदा नौ महिनामा व्यापार घाटा ६.४५ प्रतिशत बढेको छ । चैतसम्मको तथ्यांकअनुसार ११ खर्ब २१ अर्ब ३३ करोड ७७ लाख ६८ हजार रुपैयाँबराबरको व्यापार घाटा भएको तथ्यांकले देखाउँछ ।

नौ महिनाको अवधिमा कुल १४ खर्ब ९७ अर्ब ७२ करोड ७९ लाख रुपैयाँ आयात–निर्यात भएको विभागले आइतबार सार्वजनिक गरेका तथ्यांकले देखाउँछ ।