काठमाडौं । कोरोना महामारीले ठप्प बनेको नेपाली पर्यटन क्षेत्रले अहिले लय समातेको छ । २०२३ को ६ महिनामा हवाई मार्गबाट चार लाख ७६ हजार ४८१ पर्यटक नेपाल आएका छन् ।

कोरोनापछिको तुलनामा नेपाल घुम्न आउने पर्यटकको संख्यामा वृद्धि भएको नेपाल पर्यटन बोर्डले जनाएको छ । तर, अपेक्षाअनुसार पर्यटक आगमन भने हुन सकेको छैन ।

नेपाल घुम्न आएका कुल पर्यटकमध्ये चीनबाट २० हजार ११७ पर्यटक नेपाल आएका छन् । यो नेपाल घुम्न आउने पर्यटक संख्याको ४.२२ प्रतिशत हो ।

गत मार्चमा चिनियाँ संस्कृति तथा पर्यटन मन्त्रालयले आफ्ना नागरिकहरू घुम्न जाने देशहरूको सूचीमा नेपाललाई समावेश गरेको थियो । त्यसपछि कोरोनाले बन्द भएको चीन–नेपाल हवाई उडान पुनः सुचारु भयो । यसले चीनबाट नेपाल घुम्न आउने पर्यटकका संख्यामा वृद्धि हुने अपेक्षा थियो । तर, अपेक्षाअनुसार पर्यटक संख्या भने वृद्धि हुन सकेको छैन ।

यसैबीचमा पोखरामा ‘नेपाल–चीन ड्रागन बोट रेस फेस्टिभल २०२३’ को आयोजना गरियो । जसले अन्य देशबाट आउने पर्यटकको संख्या घटे पनि चीनबाट आउने पर्यटकको संख्या भने घटेको छैन ।

चीनबाट कुन महिनामा कति पर्यटक आए ?

जनावरीमा एक हजार ४३६, फेब्रुअरीमा दुई हजार २६६, मार्चमा दुई हजार ६३५, अप्रिलमा चार हजार ७७०, मेमा चार हजार ६६७ र जुनमा चार हजार ३४३ चिनियाँ पर्यटक नेपाल घुम्न आएका बोर्डको तथ्यांक छ ।

पर्यटकीय गतिविधिको हिसाबले जुन, जुलाई, अगष्टलाई अफ सिजनको रुपमा हेरिन्छ । तुलनात्मक रुपमा पर्यटक आगमन नघटेको भए पनि अपेक्षाअनुसार नआएका बोर्डका निर्देशक मणिराज लामिछानेले बताए ।

“चीनले घुम्ने गन्तव्यको रुपमा नेपाललाई राखेको र हवाई उडान सुरु भएको कारण नेपालमा चिनियाँ पर्यटकको संख्या वृद्धि हुने अपेक्षा थियो,” उनले भने, “तुलनात्मक हिसाबले हेर्दा पर्यटक आगमन घटेको छैन । तर अपेक्षाअनुसार आगमन हुन सकेन ।”

चिनियाँ बजारमा नेपाली पर्यटन गन्तव्यको बारेमा प्रचारप्रसार गर्नुपर्ने बोर्डका निर्देशक लामिछानेले बताए । चिनियाँ बजारमा पर्यटकीय गतिविधि कम भएको कारण पनि अपेक्षाअनुसार पर्यटक आगमन हुन नसकेको उनको धारणा छ ।

निर्देशक लामिछानेले चिनियाँ बजारमा नेपालका पर्यटकीय गन्तव्यको बारेमा प्रचार–प्रसार र पर्यटक आगमन बढाउनको लागि पर्यटनसँग सम्बन्धित कार्यक्रममा जोड दिनुपर्ने बताए ।

यी देशबाट आए १० हजारभन्दा बढी पर्यटक

२०२३ को ६ महिनामा सबैभन्दा धेरै भारतबाट एक लाख ६७ हजार ६०५ पर्यटक नेपाल आएका छन् । दोस्रोमा अमेरिकाबाट ४९ हजार ४३३ पर्यटक हवाई मार्गबाट नेपाल आएका छन् ।

भारत : १,६७,६०५
अमेरिका : ४९,४३३
बेलायत : २४,२६४
चीन : २०,११७
अस्ट्रेलिया : १७,६९६
बंगलादेश : १३,६२४
थाइल्यान्ड : १४,११२
साउथ कोरिया : ११,५५४
जर्मनी : १२,१६७
फ्रान्स : १०,२५०