काठमाडौँ । परराष्ट्रमन्त्रीसमेत रहेका नेपाली कांग्रेसका केन्द्रीय सदस्य एनपी साउदले सभापति शेरबहादुर देउवा चिठ्ठा परेर पाँचपटकसम्म प्रधानमन्त्री नभएको बताएका छन् । आइतबार नेपाली कांग्रेस गाउँ कार्यसमिति चौरपाटी अछामद्वारा आयोजित स्वागत तथा सम्मान कार्यक्रममा उनले एकै मान्छेलाई कहाँ पाँचपटक चिठ्ठा पर्छ भन्दै प्रश्न गरे ।

“धेरै मान्छेले भन्छन्, शेरबहादुर देउवा भाग्यले प्रधानमन्त्री भएका हुन् । उहाँ भाग्यले प्रधानमन्त्री हुनुभएको होइन । तपाईं कसैलाई पाउनु हुन्छ पाँचपटक लट्री परेको मान्छे ? कहीँ पाँचपटक एकै मान्छेलाई लट्री पर्छ ?,” साउदले भने, “शेरबहादुर देउवा भाग्यले होइन, योग्यताले प्रधानमन्त्री हुनुभएको हो । पार्टीले, विचारले हुनुभएको हो ।”

मन्त्री साउदले राष्ट्रिय स्वतन्त्र पार्टीलाई लक्षित गर्दै नयाँ पार्टीको संगठन सामाजिक सञ्जालबाहेक अन्त नरहेको दाबी गरे ।

“नयाँ नयाँ पार्टी आइरहेका छन् । सोसल मिडियाबाहेक उनीहरूको कतै संगठन छैन । उनीहरू अर्का पार्टीका कार्यकर्तालाई हामीलाई भोट दिनु भन्छन्,” उनले भने, “पार्टी पद्धतिमा विश्वाश गर्दैनन् । पार्टी पद्धतिमा विश्वास नगर्नेले देश सञ्चालन गर्न सक्दैनन् । त्यही भएर लगातार विवादमा परिराखेका छन् ।”

नेपालमा वामपन्थी चिन्तन उत्पादन नबढाउने तर वितरण बढाउने खालको भएको साउदको भनाइ छ । फरक प्रसंगमा उनले लगानीमैत्री वातावरण बनाएर आर्थिक वृद्धिको प्रक्रियालाई अगाडि बढाउने पार्टी भनेकै कांग्रेस रहेको बताए ।

“हामी अन्तर्राष्ट्रिय शक्तिलाई आश्वस्त र विश्वस्त पार्न सक्छौँ । लगानीमैत्री वातावरण बनाएर आर्थिक वृद्धिको प्रक्रियालाई अगाडि बढाउन सक्ने भएकाले हामी लोकतन्त्रका सबैभन्दा भरपर्दो पार्टी हौँ,” उनले भने ।