काठमाडौं । नारायणगढ–मुग्लिन सडकखण्ड फेरि अवरुद्ध भएको छ । चितवनको इच्छाकामना गाउँपालिका–५ स्थित तुइन खोला नजिक फेरि पहिरो खसेपछि सञ्चालनमा आएको केही समयमै सडक पुनः अवरुद्ध भएको हो । 

आज बिहान तुईन खोलामा खसेको पहिरोले अवरुद्ध उक्त सडकखण्ड केही समयपछि दुईतर्फी संचालनमा आएको थियो । यद्यपि, माथिबाट ढुंगा झर्न नरोकिएकोले सवारी साधन सावधानीका साथ चलाउन आग्रह गरिएको थियो । 

बिहान साढे ११ बजे पुनः पहिरो खसेपछि सडक दुईतर्फी अवरुद्ध भएको जिल्ला ट्राफिक प्रहरी कार्यालय चितवनले जनाएको छ । पहिरो पन्साउने काम भने भइरहेको छ । पहिरो झरेर सडक अवरुद्ध भइरहने भएकाले उक्त स्थानमा अपरेटरसहितको मेसिन तैनाथ राखिएको छ । 

यो सडक हुँदै दैनिक औसत १० हजार गाडी आवतजावत गर्छन । पटकपटक सडक बन्द हुँदा पूर्व र पश्चिम हुँदै काठमाडौं ओहोरदोहोर गर्ने यात्रु मर्कामा परेका छन् ।