काठमाडौं । घरेलु टिम भारतसँग १–१ को बराबरी खेल्दै आमन्त्रित टोली कुवेत साफ च्याम्पियनसिपको समूह ‘ए’ को विजेता बन्दै अन्तिम चारमा प्रवेश गरेको छ ।

मंगलबार भारतको बेंगलुरुस्थित श्री कान्तिराभा रंगशालामा कुवेतसँग अंक बाँडेको भारत भने समूह उपविजेता बन्दै सेमिफाइन प्रवेश गरेको हो यी । दुवै टिमले समूह चरणको अन्तिम खेलअगावै अन्तिम चारमा स्थान बनाए पनि आजको खेलले विजेता र उपविजेताको टुंगो लगाएको हो ।

खेलमा सुरुआती अग्रता भने भारतले बनाएको थियो । पहिलो हाफको इन्जुरी समयमा भारतका कप्तान सुनिल क्षेत्रीले गोल गर्दै घरेलु टिमलाई अग्रता दिलाएका थिए ।

तर, खेलको इन्जुरी समयमा भारतका अनवर अलीबाट आत्मघाती गोल उपहार पाएपछि कुवेत खेलमा फर्किएको थियो ।

खेलको अन्तिम समयमा दुवै टिमका समान एक खेलाडीले रातो कार्ड बेहोर्दै मैदानबाट बाहिरिएका थिए । भारतका रहिम अली र कुवेतका अहमद अल्कालफ हात हालहालमा उत्रिएपछि रेफ्रीबाट दुवैले रातो कार्डको दर्शन गरेका थिए ।

भारतका मुख्य प्रशिक्षक इगोर स्टिमाकले पनि रातो कार्डको दर्शन गरेका थिए । उनले यसअघि पाकिस्तानविरुद्धको खेलमा पनि रातो कार्डको सामना गरेका थिए ।

जितसँगै तीन खेलबाट सात अंक जोडेको कुवेत गोलआधारमा शीर्ष स्थानमा पुगेको हो । समान खेलबाट समान अंक जोडेको भारत दोस्रो स्थानमा रह्यो । समूहबाट बाहिरिएको नेपालले तीन अंक जोड्दा पाकिस्तान अंकविहीन बन्यो ।

अब, कुवेतले फाइनल प्रवेशका लागि समूह 'बी' को विजेता र भारतले उपविजेतासँग प्रतिस्पर्धा गर्नेछन् ।