काठमाडौं । भारतमा जारी साफ च्याम्पियनसिपको समूह चरणको अन्तिम खेलमा पाकिस्तानविरुद्ध मैदान उत्रिँदा नेपाल जितसहित प्रतियोगिताको सुखद अन्त्य गर्ने लक्ष्यमा हुनेछ । 

प्रतियोगिताको समूह ‘ए’ मा रहेका दुवै टिमको यो खेल यस संस्करणको अन्तिम खेल हो । यसअघि दुई खेलमा हार बेहोरेको नेपाल र पाकिस्तानको सेमिफाइनल पुग्ने सम्भावना समाप्त भइसकेको छ । नेपालले यसअघि पहिलो खेलमा कुवेतसँग ३–१ र दोस्रो खेलमा भारतसँग २–० को हार बेहोरेको थियो । 

पाकिस्तानले भने भारत र कुवेत दुवै टोलीसँग समान ४–० को हार बेहोरेको थियो । यसैकारण यो खेल दुवै टिमका लागि प्रतिष्ठाको खेल बन्नेछ ।

पाकिस्तानसँगको खेलअघि नेपाली टिमका मुख्य प्रशिक्षक भिन्चेन्सो अल्बर्टो एनेसले खेलाडीको मनोबल उच्च रहेको बताएका थिए ।

“हाम्रा खेलाडीहरूको मनोबल उच्च छ । हामीलाई थाहा छ भारतविरुद्ध हामीले ठूलो सुधार गर्यौंं र एकसाथ खेल्यौं । मलाई लाग्छ थ्री नेसन्स कपबाट हामीले टिममा सकारात्मक रूपमा ठूलो परिवर्तन गरेका छौं,” अल्बर्टो एनेसले भने, “हामीले अझ आक्रामक शैलीमा खेल्नुपर्छ । जब हामी विपक्षी टिमबाट जवाफी आक्रमणहरू प्राप्त गर्छौं, हामीले आक्रमण रोक्न रणनीतिक फाउलहरू गर्नुपर्छ, जस्तै भारत र कुवेतले हामीविरुद्ध धेरै पटक गरे । मलाई आशा छ कि हामीले पाकिस्तानविरुद्धको खेलमा हाम्रो पासलाई सुधार्न सिक्नेछौं ।”

भारतको बेंगलुरुस्थित श्री कान्तिराभा रंगशालामा हुने खेल नेपाली समयअनुसार दिउँसो ३ः४५ बजेदेखि सुरु हुनेछ ।

च्याम्पियनसिपको समूह ‘ए’ बाट कुवेत र भारत सेमिफाइनलमा प्रवेश गरिसकेका छन् । 

च्याम्पियनसिपमा योपटक दुई आमन्त्रित कुवेत र लेबनानसहित आठ टिमले प्रतिस्पर्धा गर्दै छन् । दक्षिण एसियाली क्षेत्रीय सहयोग संगठन (सार्क)मा सात टिम रहे पनि योपटक फिफाको प्रतिबन्धका कारण श्रीलंका प्रतियोगितामा सहभागिताको अवसरबाट वञ्चित छ ।

सहभागी आठ टिमलाई दुई समूहमा विभाजन गरिएको छ । समूह ‘ए’मा नेपालसँगै प्रतियोगिताको सर्वाधिक सफल तथा साविक विजेता भारतसँगै पाकिस्तान र कुवेत छन् । समूह ‘बी’मा लेबनान, माल्दिभ्स, भुटान र बंगलादेश छन् ।