site stats
बाह्रखरी :: Baahrakhari
खेल
Global Ime bankGlobal Ime bank
श्रीलंकाको जितमा हसरंगाको घातक बलिङ

काठमाडौं । वनिन्दु हसरंगाको घातक बलिङमा श्रीलंकाले आईसीसी क्रिकेट विश्वकप छनोटमा आयरल्यान्डविरुद्ध १३३ रनको फराकिलो जित निकालेको छ ।

आइतबार जिम्बाब्वेस्थित क्विन्स स्पोर्ट्स क्लबमा सम्पन्न खेलमा श्रीलंकाले प्रस्तुत गरेको ३२६ रनको लक्ष्य पछ्याएको आयरल्यान्डले ३१ ओभरमा सबै विकेट गुमाएर १९२ रनमात्र बनाउन सक्यो ।

आयरल्यान्डका कर्टिसले काम्फेरले ३९ रन बनाए । ह्यारी टेक्टरले ३३, जर्ज डकरेलले २६, गारेथ डेलानीले १९ र कप्तान एन्डी बलबिर्नीले १२ रन जोडे ।

आयरल्यान्डलाई सस्तैमा समेट्न श्रीलंकाका वनिन्दु हसरंगाले पाँच विकेट लिए । १० ओभर बलिङ गरेका हसरंगाले ७९ रन खर्चिए । महिसा थिक्षणाले दुई विकेट लिँदा कासुन रजिथा, लहिरु कुमारा र दासुन सनाकाले समान एक विकेट लिए ।

त्यसअघि टस हारेपछि ब्याटिङमा आएको श्रीलंकाले निर्धारित ४९.५ ओभरमा सबै विकेट गुमाएर ३२५ रनको योगफल खडा गरेको थियो ।

श्रीलंकाका दिमुथ करुणारत्नेले १०३ रन बनाएका थिए । उनले १०३ बलमा आठ चौका प्रहार गरे । सदिरा समराविक्रमाले ८२ रन थपे । धनन्जय डी सिल्भाले अविजित ४२, चरिथा असलांकाले ३८ र पथुम निसांकाले २० रन जोडे ।

आयरल्यान्डका मार्क अडायरले चार विकेट लिए । ९.५ ओभर बलिङ गरेका अडायरले एक मेडन राख्दै ४६ रन खर्चिए । बेरी म्याकार्थीले तीन विकेट लिँदा गारेथ डेलानीले दुई विकेट हात पारे ।

समूह ‘बी’ मा रहेका दुवै टिमको यो तेस्रो खेल हो । समूहमा श्रीलंकाले यसअघिका दुवै खेलमा जित निकाल्दा आयरल्यान्ड भने जितविहीन छ ।

छनोट प्रतियोगितामा सहभागी १० टिमलाई दुई समूहमा विभाजन गरिएको छ । समूह ‘ए’मा नेपालसँगै जिम्बाब्वे, नेदरल्यान्ड्स, वेस्ट इन्डिज र अमेरिका छन् । समूह ‘बी’मा युनाइटेड अरब इमिरेट्स (यूएई), श्रीलंका, स्कटल्यान्ड, आयरल्यान्ड र ओमान छन् ।

प्रत्येक समूहबाट शीर्ष तीन टिम सुपर सिक्समा प्रवेश गर्ने छन् । सुपर सिक्सबाट शीर्ष दुई टिम यसै वर्ष भारतमा हने एकदिवसीय विश्वकपका लागि छनोट हुने छन् ।

प्रकाशित मिति: आइतबार, असार १०, २०८०  २२:२४
worldlinkworldlink
प्रतिक्रिया दिनुहोस्
MPG Admark South Asian UniversityMPG Admark South Asian University
Nepal Life Insurance banner adNepal Life Insurance banner ad
Ncell Side Bar LatestNcell Side Bar Latest
Bhatbhateni IslandBhatbhateni Island
सम्पादकीय
Hamro patroHamro patro