काठमाडौं । साफ च्याम्पियनसिपमा नेपालले घरेलु टोली भारतलाई पहिलो हाफमा रोक्न सफल भएको छ । भारतको बेंगलुरुस्थित श्री कान्तिराभा रंगशालामा जारी खेलको पहिलो हाफमा दुवै टिमले प्राप्त अवसर सदुपयोग गर्न नसक्दा गोलरहित बराबरी खेले ।

आक्रमणको रणनीतिमा देखिएको नेपालले पहिलो हाफमा केही उत्कृष्ट ‘मुभ’ बनाउन सफल रह्यो । १८औँ मिनेटमा लाकेन लिम्बूले प्रहार गरेको कर्नर भारतीय रक्षकबाट हेडर क्लियर हुँदा एरिक विष्टले १८ यार्ड बक्सबाट गरेको भली भारतीय गोलकिपर गुरप्रित सिंहले मुस्किलले बचाए ।

३४औँ मिनेटमा मनीष डाँगीले राइड साइटबाट निकालेको क्रसलाई विमल घर्तीमगरले नभेट्टउँदा नेपालले गोलको अर्को सुनौलो मौका गुमायो । ३६औँ मिनेटमा मनीषले नै पेनाल्टी बक्सबाहिरबाट गरेको प्रहारले गुरप्रित सिंहलाई अफ्ठ्यारोमा पार्न सकेन ।

सनीष श्रेष्ठले ४४औँ मिनेटमा राइट साइडबाट गरेको क्रस आयुश घलानले नभेट्टाउँदा नेपालले अग्रताको अर्को सुनौलो मौका गुमायो ।