काठमाडौं । नेपाल धितोपत्र बोर्डले यही असार ४ गते घोराही सिमेन्ट इन्डष्ट्रीको आईपीओमा आवेदन बन्द गर्न निर्देशन दियो । उक्त आईपीओमा परेको आवेदनमा आशंका गर्दै बोर्डले बन्द गर्न निर्देशन दिएको हो ।

असार गते बेलुका ४ः४४ बजेसम्म पाँच लाख ६२ हजार ४३ जनाले दुई करोड २६ लाख १७ हजार ३७० कित्ता घोराही सिमेन्टको आईपीओ माग गरेका छन् । यसरी आईपीओ माग गर्नेको नौ अर्ब ८३ करोड ८५ लाख ५५ हजार ९५० रुपैयाँ रोक्का छ ।

घोराहीले प्रिमियम मूल्य ३३५ थप गरी ४३५ रुपैयाँमा आईपीओ निष्कासन गरेको थियो । तर, रकम नभएको खाताबाट १० लाख कित्तासम्म आवेदन परेकाले आशंका उब्जिएको हो ।

यस्तै, केयर रेटिङ गराउँदा पनि आफ्नो स्वार्थ बाझिने कम्पनीबाट गरेको भन्दै बोर्डले रेटिङ कम्पनीलाई स्पष्टीकरण सोधेको थियो । तर, तोकिएको समयमा केयर रेटिङ नेपालले जवाफ नदिएको पनि बोर्डले जनाएको छ ।

अब बोर्डले प्रतिवेदन तयार नपारुन्जेलसम्म कम्पनीमा आईपीओ खरिदका लागि रोक्का भएको रकम लगानीकर्ताले झिक्न पाउँदैनन् । तर, रोक्का रहेको रकम आवेदकको खातामै हुन्छ । रोक्का रहेको रकमको पनि ब्याज आउने बोर्डका उपकार्यकारी निर्देशक दिपेश ताम्राकार बताउँछन् ।

उनका अनुसार हाल आईपीओमा परेका आवेदनबारे छानबिन हुँदैन । सो छानबिनपछि पुरानै आवेदनलाई स्वीकृति दिने वा नयाँ खुला गर्न निर्देशन दिने भन्ने विषयमा निष्कर्ष निकालिनेछ ।

“हामीले छिटै नै निर्णय दिन भनेर काम गरिरहेका छौँ । चाँडै नै हामीले प्रतिवेदन अध्यक्षज्यूलाई बुझाउनेछौँ,” ताम्राकारले बाह्रखरीसित भने, “तर, आवेदकले द्विविधा हुनु पर्दैन । रकम आफ्नै बैंकमा हुन्छ । रोक्का मात्र भएको हुन्छ । त्यसको ब्याज दिनगन्ती आउँछ ।”

घोराही सिमेन्ट इन्डष्टी र केयर रेटिङ नेपालमा एउटै व्यक्तिको लगानी भएकाले स्वार्थ बाझिने भन्दै आलोचना भएको थियो । सोही कारण पनि बोर्डले जवाफ नआएको भन्दै आईपीओमा आवेदन बन्द गराएको हो ।

कम्पनीको आईपीओमा मागभन्दा बढी आवेदन परिसक्दा समेत आवेदन दिने म्याद थप गरिएको थियो ।