काठमाडौं । पोर्चुगलको लिस्बनमा भएको अन्तर्राष्ट्रिय मैत्रीपूर्ण खेलमा सेनेगलले ब्राजिललाई ४-२ ले पराजित गरेको छ ।
इस्टाडियो जस अभालाडेमा सम्पन्न खेलमा वेस्ट ह्यामका मिडफिल्डर लुकास पाकेटाले ११औं मिनेटमा ब्राजिललाई अग्रता दिलाएका थिए । तर, २२औं मिनेटमा सेनेगलका हबिब डियालोले बराबरी गोल फर्काए ।
दोस्रो हाफको सुरुमै माक्विनहोसले आत्मघाती गोलबाट सेनेगलले अग्रता बनाएको थियो । ५५ औं मिनेटमा मानेले गोल गर्दै सेनेगलको अग्रतालाई ३-१ मा पुर्याएका थिए ।
त्यसको तीन मिनेटपछि माक्विनहोसले नै गोल गर्दै ब्राजिललाई ३-२ को अवस्थामा ल्याएका थिए । तर, इन्जुरी समयमा मानेले प्राप्त पेनाल्टी सदुपयोग गरेपछि सेनेगलले ४-२ को जित निश्चित गर्यो ।
ब्राजिल र सेनेगलबीचको खेलको पहिलो रोजाईमा दुवै टिमको गरी इङ्लिस क्लबबाट खेल्ने नौ खेलाडी मैदान उत्रिएका थिए ।
पाकेटासँगै ब्राजिलको टोलीमा म्यान्चेस्टर सिटीका गोलकिपर इडरसन, न्यूक्यासलका मिडफिल्डर जोएलिन्टन र ब्रुनो गुइमारेस र टोटनह्यामका फरवार्ड रिचार्लिसन थिए।
यसैबीच, सेनेगलको टिममा नटिङ्घम फरेस्ट डिफेन्डर मौसा नियाखाते, चेल्सीका सेन्टर ब्याक कालिडो कौलिबाली, लेस्टरका मिडफिल्डर नामपालिस मेन्डी र वाटफोर्डका फरवार्ड इस्माइला सर थिए ।
