काठमाडौं । आईसीसी क्रिकेट विश्वकप छनोटमा अमेरिकाविरुद्ध नेपालले कप्तान रोहितकुमार पौडेललाई तेस्रो विकेटको रुपमा गुमाएको छ ।

जिम्बाब्वेको राजधानी हरारेस्थित तकसिंगा स्पोर्ट्स क्लबमा जारी खेलमा नेपालले कप्तान रोहितलाई स्कोरबोर्डमा ११२ रन जोड्दा तेस्रो विकेटको रुपमा गुमाएको हो ।

अमेरिकाले प्रस्तुत गरेको २०८ रनको लक्ष्य पछ्याइरहेको नेपालका लागि रोहितले २९ बलमा दुई चौकासहित १६ रन जोडे । रोहित निसर्ग पटेलले गरेको २७औं ओभरको पहिलो बलमा जसदीप सिंहबाट क्याच भए ।

जारी खेलको २६.३ ओभर समाप्त हुँदा नेपालले तीन विकेट गुमाएर ११५ रन जोडेको छ । नेपालबाट हाल क्रिजमा रहेका भीम सार्की ३३ र कुशल मल्ल एक रनमा खेलिरहेका छन् ।

त्यसअघि, टस हारेपछि ब्याटिङमा आएको अमेरिकाले ४९ ओभरमा सबै विकेट गुमाएर २०७ रनको योगफल खडा गरेको थियो ।