काठमाडौं । राष्ट्रिय स्वतन्त्र पार्टी (रास्वापा)का सांसद सुमना श्रेष्ठले नयाँ बजेटमा मानसिक स्वास्थ्यलाई पूर्ण बेवास्ता गरिएको भन्दै सरकारको ध्यानाकर्षण गराएकी छन् । आइतबार प्रतिनिधिसभा बैठकमा उनले बजेटको प्राथमिकतामा मानसिक स्वास्थ्य नपरेको बताएकी हुन् ।

“दैनिक १९ जनाले आत्महत्या गरिरहेका छन्, हामीले मानसिक स्वास्थ्यमा कति जनशक्ति खटाइरहेका छौँ ? परामर्शका लागि हाम्रा कतिवटा सिस्टम र कति भाषामा सञ्चालनमा छन् ? कहिले सोच्ने ?,” उनले प्रश्न गरिन् ।

पछिल्लो जनगणनामा छोराको अनुपातमा छोरी कम जन्मिइरहेको तथ्यांक उनले प्रस्तुत गरिन् । उनले प्रश्न गरिन्, “अहिलेको प्रजननदरमा छोरा र छोरीको अनुपात हामीलाई स्वीकार्य छ ?”

छोरा नै जन्माउनुपर्ने समाजको मान्यतालाई चिर्न र घट्दो प्रजननदरलाई बढाउनतर्फ पनि सरकारले नीति–नियम र बजेट छुट्ट्याउनुपर्नेमा उनले जोड दिइन् ।

यस्तै, नर्सिङ जनशक्ति अति न्यून परिश्रमिकमा खटिइरहनुपरेको अवस्थामा सुधार ल्याउन बजेटमा कुनै कार्यक्रम नसमेटिएको उनको भनाइ छ । “१५ हजार तलबमा काम गरिरहनुपरेको छ, त्यो पनि कति महिनामा पाउने हो थाहा छैन । अनि, कुन मुखले नर्सहरूलाई नेपाल बस भन्ने ?,” सांसद श्रेष्ठले भनिन् ।

कारबाहीको माग
नेपाल मजदुर किसान पार्टीका सांसद प्रेम सुवालले कोरोनाविरुद्धको खोप खेर फाल्ने सरकारी अधिकारीलाई कारबाही गर्न माग गरे ।

उनले भने, “कोरोनाको खोप खेर फाल्ने अधिकारीलाई कारबाही हुनुपर्छ, यसतर्फ स्वास्थ्यमन्त्रीको ध्यान जाओस्,” उनले भने ।

आउँदा दिनमा नेता र नेताका श्रीमतीको स्वास्थ्योपचार विदेशमा हुन नहुने, अत्यावश्यक औषधि आयातमा औषधि व्यवस्था विभागले ढिला गर्न नहुने विषयमा पनि सांसद सुवालले सरकारको ध्यानाकर्षण गराए ।

प्रत्येक प्रदेशमा एउटा अन्तर्राष्ट्रियस्तरको अस्पताल सञ्चालन गर्न उनले माग गरे । निजीलाई प्रोत्साहन गर्नुको साटो सरकारी अस्पतालको सुधार र व्यवस्थापनमा ध्यान दिन पनि सांसद सुवालले माग गरे ।