काठमाडौं । आगामी आर्थिक वर्ष २०८०/०८१ का लागि कर्णाली प्रदेशले ३३ अर्ब ३७ करोड ९७ लाख रुपैयाँ विनियोजन गरेको छ । 

शुक्रबार कर्णाली प्रदेशका आर्थिक मामिलामन्त्री बेदराज सिंहले आगामी आर्थिक वर्षको आय–व्यय प्रस्तुत गर्दै प्रदेशले राखेका लक्ष्य पुरा गर्न उक्त रकम विनियोजन गरिएको बताएका हुन् ।

उनले प्रदेशले गर्ने खर्चअन्तर्गत ९ अर्ब २० करोड, पुँजीगततर्फ १९ अर्ब ५७ करोड ७२ लाख र स्थानीय तहमा वित्तीय हस्तान्तणमार्फत चार अर्ब ८० करोड चार लाख विनियोजन गरेका छन् ।

प्रदेशले आन्तरिक राजस्वबाट ८३ करोड ६२ लाख रुपैयाँ प्राप्त गर्ने लक्ष्य राखेको छ । त्यस्तै, चालु आर्थिक वर्षमा खर्च नभई बचतमा सात अर्ब ४१ करोड ६ लाख हुने अनुमान गरिएको छ । उक्त रकम पनि आगामी वर्ष खर्च गरिने मन्त्री सिंहले बताए ।

संघीय सरकारबाट राजस्व बाँडफाँटबाट प्राप्त हुने आठ अर्ब ८४ करोड तीन लाख रुपैयाँ, वित्तीय समानिकरण अनुदानबाट प्राप्त हुन आएको १० अर्ब १६ करोड ४१ लाख रुपैयाँ र ससर्त अनुदानबाट प्राप्त हुने चार अर्ब ७५ करोड तीन लाखलाई पनि परिचालन गरिने बताइएको छ ।