काठमाडौं । ताइवानको प्रख्यात आइफोन निर्माता कम्पनी फक्सकनले अब विद्युतीय कार उत्पादनलाई गति दिने भएको छ ।

खासगरी चीन र अमेरिका बीचको सम्बन्धमा बढ्दो दरारका बेला कम्पनीले आफ्नो आपूर्ति श्रृखलालाई नयाँ दिशा दिन खोजिरहेको हो ।

बीबीसीसँगको एक विशेष अन्तर्वार्तामा कम्पनीका अध्यक्ष एवं मालिक यंग लिउले कम्पनीका लागि भविष्य के हुनसक्छ भनेर टिप्पणी गरेका छन् ।

फक्सकनले चीनबाट केही आपूर्ति शृङ्खला विस्थापन गरिरहेको छ । तर, आगामी दशकमा कम्पनीको वृद्धि र विकास भनेको विद्युतीय सवारी (ईभी) हुने फक्सकनका अध्यक्ष लिउ बताउँछन् ।

चीन–अमेरिकी तनाव बढ्दै जाँदा फक्सकनले सबैभन्दा खराबको स्थितिको लागि तयारी गर्नुपर्ने उनको भनाइ छ । तर, शान्ति र स्थिरतालाई दुवै देशका नेताले ध्यानमा राख्नुपर्ने उनले बताए ।

ताइवानमा होन हाइ टेक्नोलोजी ग्रुपले चिनिने फक्सकन सन् १९७४ मा टीभीको नब्स उत्पादन गर्दै सुरु भएको कम्पनी हो । हाल विश्वको शक्तिशाली कम्पनीका रुपमा रहेको फक्सकनको वार्षिक आम्दानी २०० अर्ब अमेरिकी डलर रहेको छ ।

फक्सकनले एप्पलका आधा भन्दा बढी उत्पादन बनाउँदै आएको छ । यसबाहेक कम्पनीले माइक्रोसफ्ट, सोनी, डेल र अमेजनका लागि पनि उत्पादन गर्दै आएको छ ।

फक्सकनले अहिले अब विद्युतीय कारलाई ठूलो आईफोन भन्दै उत्पादन थालेको छ । यसका केही मोडल बजारमा आइसकेका छन् भने, आगामी वर्षहरुमा विश्वबजारको पाँच प्रतिशत हिस्सा ओगट्ने कम्पनीको अपेक्षा छ ।