काठमाडौं । अमेरिकी टेक्नोलोजी कम्पनी एप्पलले एक गोपनीयतासम्बन्धी मुद्दा सुल्झाउन नौ करोड ५० लाख अमेरिकी डलर तिर्ने भएको छ । एप्पलको भ्वाइस असिस्टेन्ट 'सिरी'ले प्रयोगकर्ताको व्यक्तिगत कुराकानी रकेर्ड गरेर गोपनीयता उल्लंघन गरेको मुद्दामा करिब १३ अर्ब १९ करोड रुपैयाँभन्दा बढी तिर्न तयार भएको हो ।

आईफोन प्रयोगकर्ताहरूले सिरीमार्फत आफ्ना कुराकानी रकेर्ड गरेर एप्पलले विज्ञापनकर्ता र अन्य तेस्रो पक्षलाई बिक्री गरेको आरोप लगाएका थिए । कतिपय प्रयोगकर्ताले आफूले गरेका कुराकानीपछि फोनमा त्यस्तै विज्ञापन देखाइएको बताएका छन् ।

यसै मुद्दाको समाधानसम्बन्धी प्रस्ताव मंगलबार अमेरिकाको क्यालिफोर्नियाको संघीय अदालतमा पेस भएको छ । यस मुद्दाले सन् २०१४ को सेप्टेम्बर १७ देखि सन् २०२४ को डिसेम्बर ३१ सम्मको गोपनीयता उल्लंघनसम्बन्धी आरोपलाई समेटेको छ ।

प्रस्ताव स्वीकृत भएमा सिरी असिस्टेन्ट उपलब्ध रहेका लाखौँ डिभाइस प्रयोगकर्ताले प्रति डिभाइसको २० अमेरिकी डलर पाउने बताइएको छ ।

तर, एप्पलले यो आरोप अस्वीकार गरेको छ । कम्पनीले निरन्तर आफूले गोपनीयतालाई प्राथमिकतामा राख्दै आएको बताएको छ ।

एप्पलको सिरीले 'हे सिरी' भन्दा सक्रिय भएर आईफोन एवं अन्य डिभाइसमा विभिन्न डिजिटल कामहरू गर्न मद्दत गर्ने छ ।

द गार्जियनबाट ।