काठमाडौं । प्रस्तावित प्रधानन्यायाधीश हरिकृष्ण कार्कीविरुद्ध ‘सेटिङ’मा न्यायाधीश भएको भन्ने उजुरी परेको सांसदले बताएका छन् । शुक्रबार सिंहदरबारमा बसेको संसदीय सुनुवाइ समितिको बैठकमा सांसदले कार्कीलाई प्रश्न गरेका हुन् ।
ईश्वरीदेवी न्यौपानेले भनिन्, “सेटिङमा न्यायाधीश भएको, सार्वजनिक जग्गा किर्ते गरेर सारेको र तपाईंले पनि अंश लिएको भनेर उजुरी आएको छ, यसलाई कसरी लिनुभएको छ ?”
उनले न्यायालयमा विश्वास गुमेको भन्दै गरिबको पहुँच नपुगेको बताइन् । “सहज र सबैको पहुँच कसरी हुन्छ ?,” उनले सोधिन् ।
प्रस्तावित प्रधानन्यायाधीशविरुद्ध योपटक धेरै उजुरी परेको उनको भनाइ छ । “धेरै उजुरी परेको पहिलो घटना हो यो । अप्रिय घटना भयो । बहालवाला न्यायाधीशले पनि उजुरी आयो,” उनले भनिन्, “यहाँ नाराबाजी भयो, यसलाई कसरी हेर्नुभएको छ । भोलिको दिनमा कसरी न्याय दिनुहुन्छ ?”
कार्कीलाई उनले अर्को प्रश्न पनि गरिन्, “इजलास बहिष्कार गरेर तलबभत्ता लिएको भन्ने पनि उजुरी आएको छ, यसलाई कसरी लिनुभएको छ ?”
