काठमाडौं । बलिङमा उत्कृष्ट प्रदर्शनका बाबजुद नेपाल एसीसी महिला इमर्जिङ टिम्स कपमा पाकिस्तान ‘ए’सँग नौ रनले पराजित भएको छ ।

मंगलबार हङकङको मोङकङस्थित मेसन रोड मैदानमा पाकिस्तानले ८८ रनको लक्ष्य प्रस्तुत गरेको थियो । जवाफमा नेपालले निर्धारित २० ओभरमा ६ विकेट गुमाएर ७८ रन मात्र बनाउन सक्यो ।

नेपालकी ओपनर कविता कुँवरले २० र कविता जोशीले १५ बाहेक नेपाली टिमबाट अरू खेलाडीले दोहोरो अंकमा रन जोड्न सकेनन् । ज्योति पाण्डे नौ रनमा अविजित रहिन् । सम्झना खड्काले सात, कप्तान रुबिना क्षेत्री र सीता रानामगरले समान ६ रन जोडे । इन्दु वर्माले चार र विन्दु रावलले तीन रन थपे ।

पाकिस्तानकी तुबा हसन र सयेदा अरुबीले समान दुई विकेट लिए । अनोसा नासिर र उम्म–इ–हानीले एक/एक विकेट लिए ।

त्यसअघि, टस हारेपछि ब्याटिङमा उत्रिएको पाकिस्तानले १९.२ ओभरमा सबै विकेट गुमाएर ८७ रन बनाएको थियो ।

पाकिस्तान ‘ए’का लागि ओपनर शवाल जुल्फिकरले ३६ बलमा २८ रन जोडिन् । कप्तान फतिमा सनाले १६, सदफ शामसले १२ र गुल फेरोजाले ११ रन बनाए ।

नेपालकी इन्दु वर्माले तीन विकेट लिइन् । कविता जोशी, कविता कुँवर र सीता रानामगरले समान दुई विकेट लिए ।

थाइल्यान्डले भिसा समस्याका कारण अन्तिम समयमा नाम फिर्ता लिएपछि नेपालले यो प्रतियोगितामा खेल्ने अवसर पाएको हो । एसीसी महिला इमर्जिङ टिम्स एसिया कपमा नेपाली टोलीको यो पहिलो सहभागिता हो ।

प्रतियोगितामा नेपाल समूह ‘ए’मा छ । नेपालले समूहमा हङकङ, भारत र पाकिस्तानविरुद्ध प्रतिस्पर्धा गर्नेछ । दोस्रो खेल नेपालले यही जुन १५ मा भारतसँग खेल्नेछ । नेपालले जुन १७ मा घरेलु टोली हङकङसँग खेल्नेछ ।

समूह ‘बी’मा मलेसिया, यूएई, बंगलादेश र श्रीलंका ‘ए’ छन् । दुवै समूहबाट शीर्ष दुई टोली सेमिफाइनलमा पुग्नेछन् । सेमिफाइनल जुन १९ मा हुनेछ । फाइनल खेल जुन २१ मा हुनेछ ।