काठमाडौं । गत फागुनसम्म पूर्व–पश्चिम विद्युतीय रेलमार्गका लागि ५४ किलोमिटर ट्रयाक बेड बिछ्याइएको छ । आइतबार अर्थमन्त्री डा. प्रकाशरण महतले संसद्मा पेस गरेको आर्थिक सर्वेक्षणले यस्तो विवरण सार्वजनिक गरेको हो ।

पूर्व–पश्चिम विद्युतीय रेलमार्गका लागि बर्दिबास–निजगढ खण्डमा ५४.५ किलोमिटर ट्रयाक बेड बिछ्याइएको आर्थिक सर्वेक्षणको प्रतिवेदनमा उल्लेख छ । यस्तै, सो खण्डमा सातवटा रेल्वे पुल निमार्ण गरिएको छ ।

यस्तै, जल यातायातका लागि विभिन्न १० वटा नदीमा सम्भाव्यता अध्ययन गरिएको समेत आर्थिक सर्वेक्षण प्रतिवेदनमा उल्लेख छ ।

जल यातायातका लागि गत फागुनसम्म कर्णाली नदीमा (११५ किलोमिटर), कालीगण्डकीमा (९५ किलोमिटर), कोसी नदीमा (७५ किलोमिटर), नारायणी नदीमा (८५ किलोमिटर), त्रिशूली नदीमा (२२ किलोमिटर) र सुनकोशी नदीमा (६८ किलोमिटर) जल क्षेत्रमा अध्ययन सम्पन्न भएको छ ।

यस्तै, राप्ती नदीमा (१०२ किलोमिटर), बबई नदीमा (५२ किलोमिटर), दूधकोसी नदीमा (२० किलोमिटर) र मर्स्याङ्दी नदीमा (२० किलोमिटर) जल क्षेत्रमा आन्तरिक जलमार्गमा जलयान सञ्चालनसम्बन्धी सम्भाव्यता अध्ययन सम्पन्न भएको सर्वेक्षण प्रतिवेदनमा उल्लेख छ ।

यसका साथै कोसी नदीमा प्यासेन्जर रिभ टर्मिनल निर्माणका लागि विस्तृत परियोजना प्रतिवेदन (डीपीआर)समेत तयार भएको आर्थिक सर्वेक्षण प्रतिवेदनमा उल्लेख छ ।