काठमाडौं । भारतको बैंग्लोरका लागि उडेको नेपाल एयरलाइन्सको एउटा विमानलाई त्रिभुवन अन्तर्राष्ट्रिय विमानस्थलमै फर्काएको छ ।
आरए २२५ उडान नम्बरको विमानलाई बैंग्लोर नपुगी काठमाडौं नै फर्काएको त्रिभुवन अन्तर्राष्ट्रिय विमानस्थलका प्रवक्ता टेकनाथ सिटौलाले बाह्रखरीलाई जानकारी दिए ।
शनिबार दिउँसो पौने २ बजे त्रिभुवन अन्तर्राष्ट्रिय विमानस्थलबाट उडेको विमानलाई केही बेरमै काठमाडौं फर्काइएको उनले बताए । उनका अनुसार विमानमा चरा ठोक्किएको आशंका गरिएको छ । चरा ठोक्किएको/नठोक्किएको पुष्टि हुन भने बाँकी छ ।
अहिले उक्त विमानको चेकजाँचको कार्य भइरहेको उनले जानकारी दिए ।
नेपाल एयरलाइन्सका प्रवक्ता रमेश पौडेलका अनुसार उक्त विमानमा चालक दलका सदस्यसहित १५९ जना सवार थिए ।
त्यसमा सवारी यात्रीलाई अर्को विमानमार्फत आजै बैंग्लोर पठाउने तयारी गरिएको उनले बताए । बेलुका ५ बजेर २० मिनेटमा नेपाल एयरलाइन्सकै वाइडबडी ३२० विमानमार्फत उनीहरूको उडान तय गरिएको प्रवक्ता पौडेलले जानकारी दिए ।
प्राविधिक परीक्षणपछि फर्काइएको विमानबारे निर्णय लिइने उनले बताए ।
-1715010811.jpg)
