काठमाडौं । इजिप्टको स्वेज नहरमा फसेको एउटा ठूलो पानीजहाजलाई टगबोटहरूले सफलता पूर्वक निकालेका छन् । संसारको सबैभन्दा व्यस्त जलमार्गहरू मध्येको एक स्वेज नहरमा अड्किएको जहाज पुनः सञ्चालनमा आएको बिहीबार शिपिंग एजेन्ट लेथ एजेन्सीले बताएको हो ।

अड्किएको उक्त जहाज १९० मिटर लामो जिन हाई टोङ २३ बल्क क्यारियर भएको लेथले बताएको छ । जहाजलाई बिहीबार बिहान करिब पौने आठ बजे पुनः फ्लोट गरिएको बताइएको छ ।

नहरका अधिकारीहरूले एक विज्ञप्तिमा इन्जिन खराब भएको जानकारी पाएको र जहाजलाई सफलतापूर्वक तैराउन टगबोट परिचालन गरिएको बताएका छन् ।

जहाजलाई तान्न प्रयोग हुने विन्च फेल भएकाले प्रक्रिया केही समय ढिलो भएको उनीहरुको भनाइ छ । पानीजहाजको समस्या समाधान भएसँगै दुवै दिशामा ढुवानी गतिविधि सामान्य अवस्थामा फर्किने नहरका अधिकारीहरुले बताएका थिए ।

यस्तै, एउटा घटना सन् २०२१ मा भएको थियो । त्यतिबेला एउटा ठूलो कन्टेनर जहाज एभर गिभेन तीव्र हावाको बीच स्वेज नहरमा अड्किएको थियो । ६ दिनसम्म जाम भई दुईतर्फी ढुवानी रोकिएको उक्त घटनाले विश्वव्यापी व्यापारमा बाधा पुर्‍याएको थियो।