कठमाडौं । राप्रपा नेपाल कार्यसम्पादन समितिको बैठकले केन्द्रीय समितिमा प्रस्तुत हुने राजनीतिक कार्यपत्र र प्रतिवेदनहरु अनुमोदन गरेको छ । बैठकले संघीयता मुलुकले धान्न नसक्ने भन्दै केन्द्रमा बलियो सरकार र तल्लो तहमा अधिकार सम्पन्न स्थानीय निकाय भए पुग्ने भएको निर्णय गरेको छ ।

पार्टी महामन्त्री राजाराम बर्तौलाका अनुसार बैठकले बीचको प्रदेशको संरचना खारेज गर्नुपर्ने बहस भएको जानकारी दिए । यस्तै, बैठकमा पार्टीले पार्टीको प्रदेश कार्यसमिति पनि हटाउनुपर्ने माग भएको उनले जानकारी दिए ।

यसबारेमा केन्द्रीय समितिमा थप विस्तृत छलफल भएर निर्णय हुने बर्तौलाले जानकारी दिए । बैठकले जनवर्गीय संगठन, विभाग र समितिहरुको ६ महिने कार्ययोजनाहरुलाई पनि केन्द्रीय समितिमा प्रस्तुत गर्ने गरी अनुमोदन गरेको छ । राप्रपा नेपालको केन्द्रीय समितिको बैठक जेठ ९ र १० गते काठमाडौंमा बस्दै छ ।

“बैठकमा पार्टी अध्यक्ष कमल थापाद्वारा प्रस्तुत ‘वर्तमान परिस्थिति एवं राप्रपा नेपालको वैचारिक, सांगठनिक तथा रणनीतिक कार्यदिशा र कार्ययोजना, महामन्त्रीहरु भाष्कर भद्रा, सुशील श्रेष्ठ, राजाराम बर्तौला र केशवराज श्रेष्ठद्वारा प्रस्तुत सचिवालय, प्रशिक्षण, संगठन र युवा स्मार्ट पार्टी निर्माणसम्बन्धी प्रतिवेदन तथा कोषाध्यक्ष ज्ञानेन्द्र कार्कीद्वारा प्रस्तुत आर्थिक प्रतिवेदनमाथि छलफल गरी केन्द्रीय समितिमा प्रस्तुत गर्न अनुमोदन गरेको हो,” बर्तौलाले भने ।