काठमाडौं । कोलकाता नाइट राइडर्सविरुद्ध एक रनको रोमाञ्चक जित निकाल्दै लखनउ सुपर जायन्ट्सले इन्डियन प्रिमियर लिग (आईपीएल)को प्लेअफमा स्थान पक्का गरेको छ ।
कोलकातालाई जितका लागि अन्तिम ओभरमा २१ रन आवश्यक थियो । तर, यश ठाकुरको ओभरमा कोलकाताबाट क्रिजमा रहेका रिन्कु सिंह र वैभव अरोराले १९ रनमात्र जोड्दा लखनउले एक रनको रोमाञ्चक जित निकालेको हो ।
शुक्रबार इडेन गार्डेनमा सम्पन्न खेलमा लखनउले प्रस्तुत गरेको १७७ रनको लक्ष्य पछ्याउने क्रममा कोलकाताले निर्धारित २० ओभरमा सात विकेट गुमाएर १७५ रनमात्र जोड्न सक्यो ।
कोलकाताका रिन्कु सिंहले ३३ बलमा ६ चौका र चार छक्कासहित ६७ रन बनाए पनि टिमको हार टार्न सकेनन् । जासन रोयले ४६, वेन्कटेस ऐयरले २४ र रह्मनुल्लाह गुर्बजले १० रन थपे ।
लखनउका यश ठाकुर र रवि बिस्नोईले समान दुई विकेट लिए । क्रुनल पन्ड्या र कृष्णप्पा गौतमले एक-एक विकेट लिए ।
त्यसअघि, टस हारेर ब्याटिङमा आएको लखनउले निर्धारित २० ओभरमा आठ विकेट गुमाएर १७६ रनको योगफल खडा गरेको थियो ।
लखनउका निकोलस पुरनले ३० बलमा चार चौका र पाँच छक्कासहित ५८ रन जोडे । क्विन्टन डी ककले २८, प्रेरक मन्डकले २६, आयुश बडोनीले २५ र कृष्णप्पा गौतमले ११ रन थपे ।
कोलकाताका शार्दुल ठाकुर, सुनिल नारिन र वैभव अरोराले समान दुई विकेट लिए । हर्शित राना र वरुण चक्रवर्तीले एक-एक विकेट लिए ।
जितसँगै १४ खेलबाट १७ अंक जोडेको लखनउ प्रतियोगिताको प्लेअफमा पुग्ने तेस्रो टिम बनेको हो । यसअघि, गुजरात टाइटन्स र चेन्नाई सुपर किङ्सले प्लेअफमा स्थान पक्का गरिसकेका छन् ।
१४ खेलबाट १२ अंक जोडेको कोलकाता भने प्रतियोगिताबाट बाहिरिएको छ ।
