काठमाडौं । प्रधानमन्त्री पुष्पकमल दाहाल ‘प्रचण्ड’सँग बिहिबार प्रतिनिधिसभामा प्रश्नोत्तर हुँदै छ । प्रश्नोत्तरका क्रममा सत्तासाझेदार दल नेपाली कांग्रेस र प्रमुख प्रतिपक्ष नेकपा (एमाले)का सांसदले प्रधानमन्त्रीको भारत भ्रमणको एजेन्डाका विषयमा प्रश्न उठाएका छन् ।

विगत लामो समयदेखि चर्चा भएर पनि प्रधानमन्त्रीको भारत भ्रमणको मिति अझै तय हुन सकेको छैन । तर, सांसदहरूले उनको भ्रमणका एजेन्डाका विषयमा प्रश्न उठाइसकेका छन् ।

“प्रधानमन्त्रीको भारत भ्रमणमा लिपुलेक, कालापानीको मुद्दा उठ्छ कि उठ्दैन,” कांग्रेस र एमालेका सांसदहरूले संसद् सचिवालयमा टिपाएको प्रश्नमा उल्लेख छ ।

यस्तै, एमालेका सांसदहरूले नक्कली भुटानी शरणर्थी प्रकरण चर्चाका लागि मात्र हो वा दोषी सबैलाई साँच्चै कारबाही गर्ने हो ? भन्ने प्रश्न टिपाएका छन् ।

सांसदहरूले शान्ति प्रक्रियाका विषयमा पनि प्रश्न सोधेका छन् । “शान्ति प्रक्रियाको बाँकी काम कहिले सकिन्छ ?,” सांसदहरूले टिपाएको प्रश्नमा उल्लेख छ ।

यसैगरी, माओवादीका पूर्वलडाकुको खर्च छानबिन गर्न तयार हुनुहुन्छ कि हुनु हुन्न ?, लाल आयोगको प्रतिवेदन कहिले सार्वजनिक हुन्छ ? शिक्षा ऐन संशोधन विधेयक र नागरिकता विधेयक कहिले आउँछ ? उच्च शिक्षा आयोगको प्रतिवेदन कहिले सार्वजनिक हुन्छ ? लगायत प्रश्न पनि टिपाएका छन् ।

२० प्रश्न टिपाइएको छ । तर, नियमावलीको व्यवस्थाअनुसार १५ प्रश्न मात्र सोध्ने व्यवस्था मिलाइएको संसद् सचिवालयले जनाएको छ ।

कांग्रेस र एमालेका सांसदले तीन/तीन प्रश्न सोध्ने र एकभन्दा बढी सांसद भएका दलका तर्फबाट एक/एक प्रश्न सोध्ने तय गरिएको छ । तर, एक सांसद भएका दल र स्वतन्त्रमध्ये कसले आजको बैठकमा प्रश्न सोध्ने भन्ने अझै टुंगो लागेको छैन ।