एजेन्सी । फ्रान्सले आगामी बर्ष रुसमा हुने विश्वकप फुटबलमा स्थान पक्का गरेको छ । युरोपियन क्षेत्रको छनोट अन्तर्गत मंगलबार राति बेलारुसलाई २–१ ले पराजित गर्दै समूह ए बाट फ्रान्सले विश्वकप यात्रा तय गरेको हो ।

घरेलु मैदानमा भएको खेलमा फ्रान्सलाई जित दिलाउन एन्टोनी ग्रिजम्यान र ओलिभर जेरुडले समान एक एक गोल गरे । बेलारुसका लागि एन्टोन सारोकाले एक गोल फर्काए । खेलमा तीनै गोल पहीलो हाफमा भएको थियो ।

खेलको २७ औं मिनेटमा ग्रिजम्यानले गोल गर्दै फ्रान्सलाई सुरुवाती अग्रता दिलाएका थिए । खेलको ३३ औं मिनेटमा जेरुडले फ्रान्सको अग्रता दोब्बर बनाए । तर, ४४ औं मिनेटमा बेलारुसका सारोकाले एक गोल गरेपछि पहिलो हाफमा फ्रान्सले २ – १ को अग्रता बनायो । दोस्रो हाफमा दुवै टोलीले गोल गर्न सकेनन र खेल फ्रान्सले जित्दै विश्वकपमा स्थान पक्का गर्यो ।

यो जितपछि फ्रान्सले १० खेलबाट २३ अंक जोड्न सफं भयो । यो समूहबाट स्विडेनले प्ले अफमा स्थान बनायो । मंगलबार राति नेदरल्याण्डसँग २ – ० ले पराजित भएपनि स्विडेनले दोस्रो स्थानमा रहदै प्ले अफमा स्थान बनाएको हो । दुवैको समान १९ – १९ अंक भएपनि स्विडेन गोल अन्तरमा अघि रहेको छ । नेदरल्याण्ड भने विश्वकपबाट बाहिरिएको छ ।