काठमाडौं । म्यानचेस्टर सिटीका रक्षक नाथन एकेले दुई र मेम्फिस डिपाएले एक गोल गरेपछि नेदरल्यान्ड्सले सोमबार राति युरो २०२४ को छनोट प्रतियोगितामा १० खेलाडीमा सीमित गिब्राल्टरमाथि ३–० को विजय हासिल गरेको छ ।

घरेलु टोली नेदरल्यान्ड्सले डिपाएको गोलबाट २३औँ मिनेटमा अग्रता लिएको थियो । ५०औँ मिनेटमा एकेले अग्रता दोब्बर बनाए ।

५१औँ मिनेटमा लिएम वाल्करले रातो कार्डको सामना गरेपछि गिब्राल्टर १० खेलाडीमा सीमित भएको थियो । खेल सकिन आठ मिनेट बाँकी हुँदा एकले अर्को गोल थपेपछि नेदरल्यान्ड्सले सहज जित दर्ता गरेको थियो ।

जितसँगै तीन अंक जोडेको नेदरल्यान्ड्स छनोट प्रतियोगितामा समूह ‘बी’को तेस्रो स्थानमा छ । फ्रान्स ६ अंकसहित शीर्ष स्थानमा छ । गएको शुक्रबार राति नेदरल्यान्ड्स फ्रान्ससँग ४–० ले पराजित भएको थियो । तीन अंक नै जोडेको ग्रीस दोस्रो स्थानमा छ । अंकविहीन आइरल्यान्ड चौथो र गिब्राल्टर पाँचौँ स्थानमा छ ।

फ्रान्सले गए राति आयरल्यान्डलाई १–० ले हराएको थियो ।

“हामी बल पोसेसनमा कमजोर रह्यौँ । यो निकै कठिन साँझ थियो,’’ जितका बाबजुद प्रदर्शनबाट असन्तुष्ट नेदरल्यान्ड्सका कप्तान भर्जिल भान डाइकले भने, “हामीले तीन गोल गरेका छौँ । वास्तवमा अझ धेरै गोल गर्नुपर्थ्यो । त्यो हामीले अर्को खेलमा सुधार गर्नुपर्ने कुरा हो ।’’