काठमाडौं । देउखुरी क्रिकेट रंगशालामा जारी प्रधानमन्त्री कप पुरुष क्रिकेट प्रतियोगितामा विभागीय टिम एपीएफ क्लबले मधेस प्रदेशविरुद्ध संघर्षपूर्ण जित निकालेको छ ।

बिहीबार भएको खेलमा कमलसिंह ऐरीको अलराउन्डर प्रदर्शनमा एपीएफले मधेस प्रदेशलाई दुई विकेटले पराजित गरेको हो । मधेसले दिएको १६९ रनको लक्ष्य एपीएफले ३६.५ ओभरमा आठ विकेटको क्षतिमा पूरा गर्‍यो । ऐरीले तीन छक्काको सहयोगमा अविजित २८ रन बनाए  । सामान्य लक्ष्य पछ्याउने क्रममा सुमित महर्जन ३५ रनमा पेभेलियन फर्किए पछि केही दबाबमा परेको एपिएफलाई कमलसिंह ऐरीले उत्कृष्ट खेल्दै जित दिलाए ।

मधेस प्रदेशका कमल गुप्ताले १० ओभरमा १ मेडनसहित ४० रन खर्चेर ४ विकेट लिए । प्रदीप पासवानले  १ मेडनसहित २८ रन दिएर २ विकेट लिए । रुपेश सिंह र हरिशंकर शाहले १–१ विकेट लिए ।

यसअघि, टस जितेर पहिले ब्याटिङ गरेको मधेश प्रदेशले निर्धारित ५० ओभरको खेलमा ४० दशमलव ४ आभेरमा सबै विकेट गुमाउँदै १६८ रन बनाएको थियो । मधेसका कप्तान अनिलकुमार साह र मयन यादवले ३१ रन बनाएर खेलिरहेको बेला भुवन कार्कीको बलिङमा यादव बोल्ड आउट भएपछि मधेसको विकेट पतन सुरु भएको थियो ।
 
नेपाल क्रिकेट संघ क्यानको आयोजना, प्रदेश क्रिकेट संघको समन्वय तथा दाङ क्रिकेट संघको व्यवस्थापनमा जारी प्रतियोगितामा तीन विभागीयसहित सात प्रदेशका टिम सहभागी छन् ।