नेकपा (माओवादी केन्द्र)ले सरकारको नेतृत्वका लागि पहल गर्ने निर्णय गरेको छ । यो जनादेशको उपहासका साथै सत्ता लोलुपताको उदाहरण हो । यसपटक माओवादी केन्द्रलाई जनताले सत्ताको नेतृत्व गर्ने जनादेश दिएका छैनन् ।
 
माओवादी केन्द्रका प्रवक्ताले सत्ताको नेतृत्व पाए जोसँग मिल्न पनि सकिने निर्णय भएको बताएका थिए । महासचिवले भोलिपल्ट ‘गठबन्धन छाड्ने निर्णय नभएको’ भनेर प्रवक्ताको भनाइ संशोधन गरे पनि सत्ताको ‘नेतृत्व’ लिने प्रपञ्चको खण्डन गरेनन् ।
 
गठबन्धन छाडे पनि नछाडे पनि संसद्को तेस्रो र निर्वाचनमा अपेक्षाकृत असफल दलले सरकारको नेतृत्व गर्ने कसरत थाल्नु नै संसदीय परम्परा र लोकतान्त्रिक संस्कारविपरीत हो । माओवादी केन्द्रको यस निर्णयले निर्वाचनमा व्यक्त जनादेशको अपमान गरेको छ ।
 
प्रतिनिधि सभामा नेपाली कांग्रेस सबैभन्दा ठूलो दल भएको छ । समानुपातिक मत नेकपा ९एमाले०ले सबैभन्दा धेरै पाएको छ । माओवादी केन्द्र भने प्रत्यक्ष र समानुपातिक दुवैतिर खुम्चेको छ । यसैले  कांग्रेस वा एमालेबाहेक अरू दलले सरकारको नेतृत्व गर्ने प्रयास गर्नु अलोकतान्त्रिक हुन्छ ।
 
कांग्रेस वा एमालेले सरकार बनाउनै नसकेमात्र कुनै अर्को दलको नेतृत्वमा सरकार बनाउने बाटो खोल्छ । परन्तु, त्यसो गर्नु जनादेशको उपहास त हुँदै हो विगतका यस्ता प्रयास विकृतिका कारक बन्न पुगेका अनेकौं उदाहरण छन् ।  
 
नेपालको संसदीय इतिहासमा २०५३ सालपछि केही समय यस्तै विकृत अभ्यास भएको थियो । संसद्को तेस्रो दल राष्ट्रिय प्रजातन्त्र पार्टीका नेताहरूलाई ठूला दल एमाले र कांग्रेसले पालैपालो प्रधानमन्त्री बनाएका थिए । 
 
फलस्वरूप, नेपालको राजनीतिमा कुख्यात ‘सुरासुन्दरी’, ‘राज्यको संरक्षणमा तस्करी’, ‘सांसद किनबेच’जस्ता काण्डहरू भए । शासन प्रणाली नै बदनाम भयो । त्यसका पात्रहरू र देख्ने भोग्ने धेरै अझै जिउँदैछन् । अन्ततः जनादेशको अपमानको ‘पाप’ सबैले भोगे ।  
 
मुलुकलाई त्यही बाटामा लैजाने दुश्चेष्टा हुन लागेको संकेत माओवादी केन्द्रको निर्णयले गरेको छ । यसरी जनादेशको उपेक्षा गर्ने हो भने किन निर्वाचन गर्ने रु जनादेशको अपमान हुन नदिन मूलतः कांग्रेस र एमालेका नेताहरूले राजनीतिक अडान र इमानदारी देखाउन् । 

शीर्ष भनिएका नेताहरू पदको लोभ र अहम् तुष्टिका लागि जस्तोसुकै सम्झौता पनि गर्न सक्छन् । उनीहरूका लागि सम्भवतः यही निर्वाचन अन्तिम हो । तर, अरूले त देशको माया नगरे पनि आफ्नै भविष्यका लागि समेत लोकतान्त्रिक निष्ठा बचाउने कर्तव्य पूरा गर । जनादेशको उपहास जनताकै अपमान हो ।