काठमाडौं । कतार विश्वकपमा शुक्रबार राति समूह चरणका खेलहरू समाप्त भएका छन् । यससँगै अन्तिम–१६ को समीकरण पनि पूरा भएको छ । ३२ मध्ये १६ राष्ट्रले नकआउट चरणमा स्थान बनाउँदा १६ राष्ट्र घर फर्किएका छन् ।
यसपटक एसियाबाट पहिलोपटक तीन राष्ट्रले अन्तिम–१६ मा स्थान बनाउन सफल भएका छन् । एसियाली राष्ट्र जापान, दक्षिण कोरिया र अष्ट्रेलियाले अन्तिम–१६ मा स्थान पक्का गरेका हुन् । एसियाबाट कतार विश्वकपमा ६ राष्ट्रले प्रतिस्पर्धा गरेका थिए । एसियाबाट यति धेरै राष्ट्रले विश्वकप खेलेको पनि पहिलोपटक हो ।
एसियाबाट आयोजक कतार, इरान, साउदी अरब, जापान, अष्ट्रेलिया र दक्षिण कोरियाले यस विश्वपकमा प्रतिस्पर्धा गरेका थिए । साउदी अरबले अर्जेन्टिनाविरुद्ध २–१ को सनसनीपूर्ण नतिजा निकाल्दा इरानले वेल्सलाई २–० ले स्तब्ध बनाएको थियो । कतार भने जितबिहीन भएर प्रतियोगिताबाट बाहिरिएको थियो । कतारको यो पहिलो विश्वकप पनि हो ।
युरोपबाट सबैभन्दा धेरै आठ राष्ट्रले अन्तिम–१६ मा स्थान बनाउँदा अफ्रिका र दक्षिण अमेरिकाबाट समान दुई राष्ट्रले अघिल्लो चरणमा स्थान पक्का गरे । उत्तर अमेरिकाबाट अमेरिकाले मात्र नकआउट चरणमा स्थान पक्का गर्यो ।
युरोपबाट नेदरल्यान्ड्स, क्रोएसिया, इङ्ल्यान्ड, फ्रान्स, स्पेन, पोर्चुगल, स्विट्जरल्यान्ड र पोल्यान्डले अन्तिम–१६ मा स्थान पक्का गरे । दक्षिण अमेरिकाबाट अर्जेन्टिना र ब्राजिलले अन्तिम–१६ मा स्थान बनाउँदा अफ्रिकाबाट सेनेगल र मोरक्कोले स्थान पक्का गरे ।
नकआउट चरणमा समूह ‘ए’को विजेता नेदरल्यान्ड्सले समूह ‘बी’को उपविजेता अमेरिकासँग प्रतिस्पर्धा गर्नेछ । समूह ‘ए’को उपविजेता सेनेगलले समूह ‘बी’को विजेता इङ्ल्यान्डसँग प्रतिस्पर्धा गर्नेछ ।
समूह ‘सी’को विजेता अर्जेन्टिनाले समूह ‘डी’को उपविजेता अष्ट्रेलियासँग प्रतिस्पर्धा गर्नेछ । समूह ‘सी’को उपविजेता पोल्यान्डले समूह ‘डी’को विजेता फ्रान्ससँग प्रतिस्पर्धा गर्नेछ । फ्रान्स गत संस्करणको विजेता टिम पनि हो ।
समूह ‘ई’को विजेता जापानले समूह ‘एफ’को उपविजेता क्रोएसियाविरुद्ध प्रतिस्पर्धा गर्नेछ । समूह ‘ई’को उपविजेता स्पेनले समूह ‘एफ’को विजेता मोरक्कोविरुद्ध प्रतिस्पर्धा गर्नेछ ।
समूह ‘जी’को विजेता ब्राजिलले समूह ‘एच’को उपविजेता दक्षिण कोरियाविरुद्ध प्रतिस्पर्धा गर्नेछ । समूह ‘जी’को उपविजेता स्विट्जरल्यान्डले समूह ‘एच’को विजेता पोर्चुगलसँग प्रतिस्पर्धा गर्नेछ ।
समूह चरणका खेल समाप्त हुँदा चार पटकको जर्मनी समूह चरणबाट बाहिरिएको छ । जर्मनी लगातार दोस्रो पटक समूह चरणबाटै बाहिरिएको हो । त्यस्तै फिफा वरीयाताको दोस्रो स्थानमा रहेको बेल्जियम पनि समूह चरणबाटै बाहिरिएको छ । दुई पटकको विजेता उरुग्वे, युरोपको डेनमार्क, इक्वेडर, वेल्स, मेक्सिको पनि समूह चरणबाटै बाहिरिए ।