लसएन्जलस । अमेरिकाको सानफ्रान्सिस्कोको रुलिंग बोर्ड अफ सुपरभाइजर्सले नगरका प्रहरीलाई मानिस मार्न सक्ने रोबोट प्रयोग गर्न दिने प्रस्ताव माथि मतदान गरेको छ ।
यस कदमबाट प्रहरीलाई अत्यन्तै प्रतिकूल अवस्थामा गोलीगठ्ठा र बिस्फोटक पदार्थबाट सुसज्जित रोबोटहरु आवश्यक स्थानमा तैनाथ गर्न सक्ने अनुमति प्रदान गर्न सक्छ ।
‘स्टप किलर रोबोट्स’ समूहका डा. क्याथरिन कोन्नोल्लीले यस कदमलाई ‘चिप्लो भिरालो’को संज्ञा दिँदै यसले मानिसहरुलाई हत्याबाट टाढा राख्न सक्ने बताएका छन् ।
नगर प्रहरी अर्थात सानफ्रान्सिस्को प्रहरी विभागले अहिलेलाई कुनै रोबोटलाई प्राणघातक हातहतियार सुसज्जित गरी सञ्चालनमा नल्याइने बीबीसीलाई जानकारी दिएको छ । तर, विभागले भविष्यमा घातक फौजका लागि भने रोबोटले प्रयोग गर्न सक्ने बताएको छ ।
प्रहरी प्रवक्ताले हिंसात्मक, सशस्त्र वा खतरनाक वस्तुहरु भएका सुदृढ संरचनाहरु तोड्नका लागि रोबोटहरुलाई बिस्फोटक पदार्थले सुसज्जित गर्ने सम्भावना रहेको बताएका छन् । साथै, प्रहरीहरुले कसैको जीवन नै जोखिममा पार्ने किसिमका खतरनाक र सशस्त्र आशंकित व्यक्तिहरुलाई घाइते बनाउन पनि रोबोटको प्रयोग गर्न सकिने बताएका छन् ।
यसैगरी, सुपरभाइजर बोर्डले अत्यन्तै थोरै उच्च पदस्थ अधिकारीहरुलाई मात्र रोबोट प्रयोग गर्ने अधिकार दिइने जनाएको छ । अमेरिकाको अन्य भागहरुमा यस प्रकारका घातक रोबोटको पहिलेदेखि नै प्रयोग हुँदै आएको छ ।
सन् २०१६ मा टेक्सासको डल्लासमा दुईजना प्रहरी अधिकृतको हत्या गर्नुका साथै अन्य थुप्रैलाई घाइते बनाउने एकजना स्नाइपरको हत्या गर्न सी–४ बिस्फोटक पदार्थले सुसज्जित एउटा सशस्त्र रोबोटको प्रयोग गरिएको थियो ।