काठमाडौं । कतारमा जारी फिफा विश्वकपमा आज समूह ‘सी’ र समूह ‘डी’ का निर्णायक खेलहरू हुँदै छन् ।
आज हुने पहिलो खेलमा समूह ‘डी’का चार टिमहरू प्रतिस्पर्धामा उत्रँदै छन् । जहाँ साबिक विजेता फ्रान्सले एजुकेसन सिटी रंगशालामा ट्युनिसियाविरुद्ध खेल्दा अर्को खेलमा अस्ट्रेलिया र डेनमार्क अल जनौब रंगशालामा प्रतिस्पर्धाका लागि उत्रनेछन् । दुवै खेल नेपाली समयअनुसार राति ८ः४५ बजेदेखि सुरु हुनेछ ।
समूहबाट फ्रान्सले अन्तिम खेलअगावै प्रि–क्वार्टरफाइनलमा प्रवेश गरिसकेको छ । त्यसैले आजको नतिजाले फ्रान्स समूह विजेता वा उपविजेता बन्नेमात्र टुंगो लगाउनेछ ।
समूहमा दुई खेलबाट ६ अंक जोडेको फ्रान्स तालिकाको शीर्ष स्थानमा छ । समान खेलबाट तीन अंक जोडेको अस्ट्रेलिया तालिकाको दोस्रो स्थानमा छ । यस्तै, समान एक अंक जोडेका डेनमार्क र ट्युनिसिया क्रमशः तालिकाको तेस्रो र चौथो स्थानमा छन् । अन्तिम–१६ मा स्थान बनाउन फ्रान्सबाहेक अन्य तीन टिम दबाबमा छ ।
कस्तो छ समीकरण ?
सहज अवस्थामा रहेको फ्रान्सले आज ट्युनिसियालाई हराए समूह विजेता बन्नेछ । फ्रान्सले ट्युनिसियासँग हार बेहोर्दा अर्को खेलमा अस्ट्रेलियाले डेनमार्कलाई पराजित गरे फ्रान्स र अस्ट्रेलियाको बराबर अंक हुनेछ । यस्तोमा गोलअन्तरका आधारमा समूह विजेता र उपविजेताको टुंगो लाग्नेछ ।
यता, कठिन अवस्थामा रहेको ट्युनिसियालाई भने आज अन्तिम–१६ को झिनो सम्भावना कायम राख्न फ्रान्सविरुद्ध जित्नैपर्ने दबाब छ । यता फ्रान्सलाई हराउँदा अर्को खेलमा डेनमार्कले अस्ट्रेलियालाई हराए मात्र ट्युनिसिया गोलअन्तरको आधारमा डेनमार्कलाई पछि पार्दै अन्तिम १६ मा प्रवेश गर्न सक्छ । यसका लागि ट्युनिसियालाई डेनमार्कको भन्दा राम्रो गोलअन्तर आवश्यक हुन्छ ।
यदि फ्रान्सले ट्युनिसियालाई पराजित गरे अस्ट्रेलियालाई बराबरीको नतिजा पनि अन्तिम–१६ का लागि पर्याप्त बन्नेछ । यदि डेनमार्कसँग अस्ट्रेलिया बराबरीमा रोकिँदा ट्युनिसियाले फ्रान्सलाई पराजित गरे अस्ट्रेलिया र डेनमार्कबीच गोलअन्तर राम्रो हुने टिमले अन्तिम–१६ मा स्थान बनाउनेछ । तर, आज हार बेहोरे अस्ट्रेलिया समूह चरणबाटै घर फर्किनेछ ।
डेनमार्कलाई जित्नैपर्ने दबाब छ । अर्को खेलमा फ्रान्सले डेनमार्कलाई पराजित गरे डेनमार्कले अस्ट्रेलियालाई हराउँदा सोझै अन्तिम–१६ मा स्थान पक्का गर्नेछ । डेनमार्कले अस्ट्रेलियालाई हराए पनि यदि फ्रान्स ट्युनिसियासँग पराजित भए डेनमार्क र ट्युनिसियाबीच गोलअन्तर राम्रो हुने टिम नकआउट चरणमा प्रवेश गर्नेछ ।