सुनसरी । सुनसरी निर्वाचन क्षेत्र नम्बर–४ मा विवाद समाधानका लागि सर्वपक्षीय बैठक सुरु भएको छ । त्यहाँ शनिबार अपराह्नदेखि मतगणना रोकिएको छ ।
सुनसरीको इनरुवास्थित भगवती माविको मतगणनास्थलमै बैठक सुरु भएको हो । मुख्य निर्वाचन अधिकृतको कार्यालयको आह्वानमा जारी बैठकमा सो क्षेत्रका उमेदवार, राजनीतिक दलका प्रतिनिधि, मुख्य निर्वाचन अधिकृतलगायत व्यक्ति सहभागी छन् ।
यहाँ मतगणनामा त्रुटि भएको भन्दै नेपाली कांग्रेसका नेताले पुनः गणना गर्न माग गरेका छन् । तर, एमालेका नेताहरूले गणना भइसकेको मतलाई कायम गर्दै मतगणना थाल्नुपर्ने अडान राखेका छन् ।
शनिबारै बसेको सर्वपक्षीय बैठक पनि यही विषयमा कुरा नमिलेपछि बिनानिष्कर्ष टुंगिएको थियो । मुख्य निर्वाचन अधिकृतले विवाद मिलाउन सहजीकरण गरिरहेका छन् ।
बैठकस्थल बाहिरको सुरक्षा व्यवस्था निकै कडा बनाइएको छ । बैठकस्थलमा सञ्चारकर्मीलाई पनि प्रवेश दिइएको छैन ।
सुनसरी–४ मा सञ्चार तथा सूचना प्रविधिमन्त्री समेत रहेका कांग्रेसका ज्ञानेन्द्रबहादुर कार्की र एमालेका उमेदवार जगदीश कुसियैतबीच मुख्य प्रतिस्पर्धा छ ।
