तानाशाहहरूले जनताले मत नदिए धाँधली वा षड्यन्त्र भएको ठान्ने र तदनुरूप भाष्य बनाउने गरेको  देखिन्थ्यो । दुर्भाग्य, संसारका धेरै अधिनायकहरूमा देखिएको यही प्रवृत्ति नेपालका राजनीतिक दलका नेताहरूले देखाउन थालेका छन् । 
 
प्रतिनिधि सभा तथा प्रदेश सभाको निर्वाचन परिणामले स्थापित ठूला दलका नेताप्रति जनतामा चरम वितृष्णा भएको देखाएको छ । नेताहरू भने आफूलाई जनताले अस्वीकार गरेको सत्य स्वीकार्न तयार भएनन् ।
 
जनताले नयाँ दलका युवालाई मत दिए । जनताको वितृष्णाको कारण खोज्नुभन्दा ठूला दल विशेषगरी नेपाली कांग्रेस, नेकपा (एमाले) का नेताहरू भने जनमतको सम्मान गर्नुको साटो त्यसको अपव्याख्या गरिरहेका छन् ।
 
नयाँ दलहरूको उदयले अस्थिरता बढ्ने वा सामाजिक सञ्जालमा आलोचना भएकाले आफ्नो पार्टीले हारेको हो भन्नेजस्तो कुतर्क अबका जनताले पत्याउँदैनन् । यस्ता फुटानी र फट्याइँ पत्याउने भए त तिनै दललाई सबैले मत दिइहाल्थे । 
 
व्यक्ति विशेषको कुण्ठा र मतिभ्रमको भारी नेपाली जनताले कतिन्जेल बोक्नेरु अब धाँधली वा षड्यन्त्रको भाष्य बनाएर आफ्ना कार्यकर्तालाई थप भ्रमित र उत्तेजित पार्नुभन्दा राजनीतिक दलका नेताहरूले जनादेशको सम्मान गर्दै स्वीकार गर्नु उचित हुन्छ । 
 
कसैको चित्त बुझेको छैन भने अदालतको ढोका ढकढक्याउने उनीहरूको अधिकार त  सुरक्षित नै छ । यसैले मतदान भएका क्षेत्रहरूको मतगणना गरी परिणाम सार्जनिक गरेर निर्वाचन आयोग अगाडि बढ्नुपर्छ ।
 
नेताहरूले बचेखुचेको साख पनि गुमाउने चाहना नभए चुनावमा धाँधली, षड्यन्त्र भएकाले हारियो भन्नेजस्ता अनर्गल प्रलाप गर्न बन्द गरुन् । षड्यन्त्र र धाँधलीको अधिनायकवादी भाष्य बनाउन लगाउने समय बरु आफ्ना कमजोरी केलाउन लगाए तिनको भलो हुनेछ । 
  
नयाँ दलहरूको उदयले मुलुकमा अस्थिरता हुने होइन । बरू, अहिलेका ठूला दलका नेताहरूले प्रचण्ड बहुमत  जोगाउन नसकेको इतिहास साक्षी छ । तत्कालीन नेकपा (नेकपा)ले करिब दुई तिहाइ बहुमत पाए पनि स्थिर सरकार त दिन सकेन ।