काठमाडौं । नेकपा (एमाले)का वरिष्ठ उपाध्यक्ष ईश्वर पोखरेलले आगामी निर्वाचनको परिणाम एमालेको पक्षमा आउने दाबी गरेका छन् ।
प्रतिनिधिसभा प्रत्यक्षतर्फ काठमाडौँ क्षेत्र नं ५ का उमेदवार रहेका पोखरेलले सोमबार घरदैलो अभियानका क्रममा सञ्चारकर्मीसँग कुरा गर्दै एमालेले उठाएका विषयहरु जनताले बुझेको भन्दै निर्वाचनको परिणाम एमालेको पक्षमा आउने दाबी गरे ।
एमालेले उठाएका विषयहरुलाई साकार पार्नका लागि जनताको साथ र समर्थन एमालेले पाउने पोखरेलले जिकिर गरे । निर्वाचनमा गठबन्धनका तर्फबाट फैलाइएका त्रासहरु च्यातिइसकेको उनको भनाइ छ ।
पोखरेलले एमालेले उठाएका राजनीतिक स्थायित्व, राष्ट्रिय हितको रक्षा, सुशासन, आर्थिक विकास र समृद्धिलगायतका मुद्दाहरुलाई स्थापित गरेरै छाड्ने प्रतिबद्धता जनाए ।
काठमाडौं ५ मा एमालेका पोखरेलसँग सत्ता गठबन्धनका उमेदवार नेपाली कांग्रेसका युवा नेता प्रदीप पौडेलको मुख्य प्रतिस्पर्धा हुने देखिन्छ ।
गत वैशाखमा भएको स्थानीय तहको निर्वाचनमा सो क्षेत्रमा पर्ने १५ वडामा एमालेले ११, कांग्रेसले ३ र स्वतन्त्र एउटा वडामा विजयी भएका छन् । यसअघि विसं २०७४ निर्वाचनमा एमालेका उमेदवार पोखरेल र कांग्रेसका प्रकाशशरण महतबीच भएको प्रतिस्पर्धामा पोखरेलले बाजी मारेका थिए ।
