केही समय यता बिरामीको उपचारमा संलग्न चिकित्सकहरूमाथि समेत साङ्घातिक भौतिक आक्रमणका घटना बढ्दै गएका छन् । सम्भवतः हिंसात्मक व्यवहारलाई सामान्य ठान्ने शासकको मानसिकताले यस्तो अभ्यास हुनेगरेको हो । 

बिरामीको उपचारमा हेलचेक्य्राइँ वा बेवास्ता गरिएको निहुँमा चिकित्साकर्मीमाथि हुने आक्रमण कहिले कहीँ तात्कालिक आवेगको उपज हुन्छ । धेरैजसो भने अस्पताल वा चिकित्सकबाट पैसा असुल्ने नियतले बिचौलियाले बिरामीका आफन्तलाई उक्साएर गराउँछन् । 

उत्तेजित भिड देख्नेबित्तिकै राजनीतिक कार्यकर्ता वा नेताहरू स्वार्थ सिद्धिको मौका छोप्न तम्सन्छन् । राजनीतिकर्मीको संलग्नता देखेपछि प्रहरी भने धेरैजसो पन्छने वा बीचमा बसेर उम्किने दाउमा हुन्छ ।

यसको परिणामस्वरुप भिडको आडमा स्वार्थपूर्ति गर्ने अवाञ्छित तत्त्व भने सधैँजसो कानुनी कारबाहीबाट उम्कने गरेको देखिन्छ । नत्र, स्वास्थ्य संस्थामा तोडफोड, स्वास्थ्यकर्मी वा कर्मचारीलाई कुटपिट गर्नेलाई कैद सजाय हुने कानुनी व्यवस्था प्रभावहीन हुने थिएन । 
 
बिरामीका आफन्तहरू उत्तेजित भएका अधिकांश घटनामा चिकित्सकहरूको व्यवहार पनि चित्तबुझ्दो नहुनसक्छ । नेपालका चिकित्सकहरूको पनि बिरामी र तिनका आफन्तलाई हेप्ने र पर्याप्त एवं स्पष्ट संवाद नगर्ने स्वभाव हुन्छ ।

जे भए पनि उपचारमा कमजोरी भएका निहुँमा चिकित्साकर्मीमाथि कुटपिट वा स्वास्थ्य संस्थामा तोडफोड र आगजनी गर्नु जघन्य अपराध नै हो । अस्पताल परिसरमा हुने यस्ता घटनामा सम्बन्धित स्वास्थ्यकर्मीमात्र नभएर अरू धेरै बिरामी र चिकित्सकहरूसमेत पीडित हुन्छन् ।

चिकित्सक वा अस्पतालले अपराध गरेमा कारबाही गर्ने गराउने राज्यका निकायहरू छन् ।  तर, बिरामीका आफन्तहरू आवेग वा उक्साहटमा भौतिक आक्रमणमा उत्रिँदा  कानुनी कारबाहीको बाटो नै हराउँछ । 

यस्ता घटनामा धेरैजसो बिचौलियाहरूले दुवै पक्षलाई दोहन गर्छन् । यसैले पीडित पक्ष संयमित हुनु जरुरी देखिन्छ । साथै, चिकित्साकर्मीले पनि बिरामी र तिनका आफन्तलाई हेप्ने वा संवाद नगर्ने बानी सुधार्नुपर्छ ।

परन्तु, नेपाल प्रहरीले मध्यस्थता गर्नुको साटो कानुन कार्यान्वयनमा दृढता देखाउने हो भने सम्भवतः समाजमा हुने अरू धेरै बाहुबलीका गुण्डागर्दीजस्तै चिकित्सकमाथिको आक्रमण पनि रोकिनेछ । अपराध गरेपछि कानुनबमोजिम सजाय हुन्छ भन्ने स्थापित गर्नु यो अपराध नियन्त्रणमा पनि प्रभावकारी उपाय हुने लेदिन्छ ।

यसैगरी नेपाल मेडिकल काउन्सिलले पनि परेका उजुरीहरूमा बेलैमा निर्णय दिएर चिकित्सकहरूले गल्ती गरेमा कारबाही हुने विश्वास जनतामा जगाउन सक्नुपर्छ । प्रहरी र काउन्सिलले आफ्नो काम गराइमा परिवर्तन नगर्दासम्म हुल्याहाहरूले चिकित्सकमाथि हातपात र स्वास्थ्य संस्थामा तोडफोड गरिरहनेछन् ।