सुर्खेत । एउटामात्रै निर्वाचन क्षेत्र रहेको जाजरकोटमा आगामी मंसिर ४ गते हुने प्रदेश तथा प्रतिनिधि सभाको निर्वाचनमा सत्ता गठबन्धनका उमेदवारहरु दोहोरिने र एमालेका उमेदवार विगतको पराजितलाई उल्ट्याउने रणनीतिमा देखिएका छन् । 

जाजरकोटका प्रभावशाली नेता तथा गठबन्धनका उमेदवार शक्तिबहादुर बस्नेत र प्रदेश सभामा राजीवविक्रम शाह निर्वाचित भएर दोहोरिने दौडमा छन् । 

बस्नेत र शाहका प्रतिद्वन्द्वी मानिएका नेकपा एमालेका उमेदवार  निरज आचार्य र डम्बरबहादुर सिंह २०६४ र २०६८ को पराजयलाई उल्ट्याएर जित्ने रणनीतिमा छन् ।

सत्ता गठबन्धनका तर्फबाट माओवादी केन्द्रका नेता शक्तिबहादुर बस्नेत प्रतिनिधि सभा सदस्यमा उमेदवार छन् । 

सत्ता गठबन्धनबाट प्रदेश ’क’ मा नेपाली कांग्रेसबाट वेदराज सिंह  र प्रदेश ’ख’ बाट नेपाली कांग्रेसका राजीव विक्रम शाह उमेदवार रहेका छन् । 

माओवादीका प्रभावशाली नेता बस्नेत चौथोपटक जाजरकोटमा निर्वाचित हुने दौडमा छन् । 

उनी २०६४, २०६८, २०७४ मा निर्वाचित भएका थिए । राजीव विक्रम शाह २०७० सालमा निर्वाचित भएभने २०७४ मा पराजित भएका थिए । 

कांग्रेसका प्रभावशाली नेता शाह प्रदेश मुख्यमन्त्रीको लाइनमा छन् । जाजरकोटमा बस्नेत र शाहीको चर्चा अलि बढी हुने गरेको छ । 

नेकपा एमालेका आचार्य र सिँह २०६४ र २०६८ मा एमालेबाट सांसदको उमेदवार थिए । 

दुवै क्रमशः बस्नेत र शाहसँग पराजित भएका थिए । जाजरकोटमा सत्ता गठबन्धन र एमालेका उमेदवारबीच चुनावी टक्कर देखिएको छ ।