काठमाडौं । पाकिस्तान फुटबल संघ (पीएफएफ)ले नेपालविरुद्धको दुई मैत्रीपूर्ण खेलको घोषणा गरेको झण्डै तीन साता हुन लाग्यो । तर, नेपाल फुटबल संघ (एन्फा)ले भने मैत्रीपू‍र्ण खेलबारे केही टुंगो नलागेको बताएको छ ।

पाकिस्तानले १३ अक्टोबरमा नोभेम्बरको मध्यतिर नेपालविरुद्ध मैत्रीपूर्ण खेल खेल्ने घोषणा गरेको थियो । तर, एन्फाका वरिष्ठ उपाध्यक्ष वीरबहादुर खड्काले पाकिस्तानबाट मैत्रीपूर्ण खेलका लागि प्रस्ताव आएको भएपनि एन्फाको आगामी बैठकले मात्र त्यसबारे निर्णय लिने बताएका छन् । 

“एन्फालाई पाकिस्तान फुटबल संघले मैत्रीपूर्ण खेलका लागि प्रस्ताव गरेको हो । तर, त्यसबारे निर्णय भइसकेको छैन । प्रस्तावित खेल ‘फिफा डे’मा पनि छैन । यसबारे सोमबार हामी पदाधिकारी बैठक बसेर निर्णयमा पुग्नेछौँ,” वरिष्ठ उपाध्यक्ष खड्काले भने । 

उपाध्यक्ष खड्काले खेलबारे कुनै निर्णय नभएको बताएपनि फुटबल पाकिस्तान डटकमले पाकिस्तान फुटबल संघलाई उद्धृत गर्दै नोभेम्बर १४ देखि २१ को दुई देशबीच दुई खेले हुने जनाएको छ । त्यसका लागि पाकिस्तानी टिम १३ नोभेम्बरमा नेपाल आउनेसमेत समाचारमा उल्लेख छ । पाकिस्तान फुटबल संघले पनि फेसबुक पेजमा लाहोरमा ६ साताको प्रशिक्षणपछि मैत्रीपूर्ण खेलका लागि नेपाल जाने उल्लेख गरेको छ ।

पाकिस्तानले नेपाल भ्रमणका लागि तयारी गरिरहँदा एन्फाका पदाधिकारी भने यसबारे अन्योलमै छन् । एन्फाका प्रवक्ता सुरेश शाहले पनि पाकिस्तानविरुद्ध मैत्रीपूर्ण खेल्नेबारे टुंगो नलागेको बताए ।

उनले भने, “पाकिस्तानले दुई खेलका लागि प्रस्ताव गरेको छ । तर, खेल्ने नखेल्ने भन्ने बारेमा अझै केही निर्णय भइसकेको छैन । यसका लागि एन्फा कार्यसमितिको आगामी बैठकले निर्णय गर्नेछ ।”

प्रवक्ता शाहले कार्यसमिति बैठकबाट निर्णय लिने बताएका छन् । तर, वरिष्ठ उपाध्यक्ष खड्का भने पदाधिकारी बैठकबाट नै यस विषयमा निर्णय लिने बताउँछन् । अर्थात् एन्फा पदाधिकारी नै यस विषयमा स्पष्ट छैनन् । यसबाट नै थाहा हुन्छ कि एन्फा पाकिस्तानविरुद्धको मैत्रीपूर्ण खेलका लागि गम्भीर छैन ।

अझै सुरु भएन प्रशिक्षक नियुक्तिको प्रक्रिया
पाकिस्तानले बताएको मितिमै खेल्ने हो भने अब दुई साता मात्र समय छ । तर, नेपाली टिमले त्यसको कुनै तयारी गरेको छैन । नेपाली टोलीका तत्कालीन मुख्य प्रशिक्षक अब्दुल्लाह अल्मुताइरीले राजीनामा दिएपछि रिक्त स्थान पूर्तिका लागि पनि एन्फाले कुनै कदम चालेको छैन ।

यस बिचमा नेपाली टोलीले बंगलादेशविरुद्ध एक मैत्रीपूर्ण खेल खेलेको थियो । उक्त खेलमा एन्फाले प्रदीप हुमागाईंलाई कार्यबाहक मुख्य प्रशिक्षक तोकेको थियो । हुमागाईंले उक्त खेल सकिए लगत्तै आफ्नो कार्यकाल समाप्त भएको बताएका थिए । त्यसकारण अहिले नेपाली टोली प्रशिक्षकविहीन छ । एन्फाले हुमागाईंलाई कार्यबाहक मुख्य प्रशिक्षकको जिम्मेवारी दिएपछि अल्मुताइरीले पदबाट राजीनामा दिएका थिए ।

अल्मुताइरीले नेपाली टिमको प्रशिक्षण छोडेको तीन महिना बढी भइसक्यो । तर, एन्फाले भने अझै नयाँ प्रशिक्षकका लागि औपचारिक प्रक्रियासमेत सुरु गरेको छैन । 

एन्फाका प्रवक्ता शाहले पाकिस्तानविरुद्ध खेल्ने तय भएमा उक्त खेलका लागि स्थायी रूपमा मुख्य प्रशिक्षक नियुक्तिको सम्भावना अहिले कम भएको बताए ।

“केही प्रशिक्षकहरूसँग कुराकानी भइरहेको छ । तर, औपचारिक प्रक्रिया भने सुरु भइसकेको छैन,” एन्फा प्रवक्ता शाहले थपे, “नियुक्त गर्नका लागि ३५ दिने आवेदन सूचना निकाल्नुपर्छ  । त्यसबाट छनोट गर्नुपर्छ । यसका लागि केही समय लाग्छ ।”

गएको जुन दोस्रो साता कुवेतमा भएको एसिया कप छनोटतेस्रो चरणको प्रतियोगितापछि एन्फासँग तीन महिना छुट्टी लिएर बसेका तत्कालीन प्रशिक्षक अल्मुताइरीले कुवेतबाटै राजीनामा दिएका थिए ।

यदि पाकिस्तानविरुद्धको खेल भएमा कार्यबाहक प्रशिक्षक नियुक्त भएका हुमागाईंलाई निरन्तरता दिने मनस्थितिमा पनि एन्फा छैन । खेलपछि हुमागाईंले दिएको अभिव्यक्ति विवादस्पद बनेको थियो । उनलाई कारबाही गर्न नेपाल खेलकुद पत्रकार मञ्चले एन्फाको ध्यानाकर्षण गराएको थियो । 

“हामी विदेशी प्रशिक्षक नै ल्याउने तयारी गरिरहेका छौँ । यसका लागि केही प्रशिक्षकहरूसँग हामीले वार्ता प्रक्रिया पनि अघि बढाएका छौँ । तर, सूचना निष्कासन, सीभी सर्टलिस्ट गर्ने आदी प्रक्रिया पूरा गर्दा यसका लागि केही समय लाग्छ,” एन्फा प्रवक्ता शाहले थपे, “प्रदीप हुमागाईं र उनका अन्य अफिसियलहरूसँग एन्फाले बंगलादेशसँगको खेलका लागि मात्र करार सम्झौता गरेको हो । त्यसैले खेलसँगै उनीसँगको सम्झौता समाप्त भइसकेको छ र फेरि आउने सम्भावना छैन ।”

बंगलादेशसँगको मैत्रीपूर्ण खेलपछि तितरबितर बनेको नेपाली टिमका नियमित सदस्य सुमन अर्याल अस्ट्रेलिया गइसकेका छन् । राष्ट्रिय टिमबाट खेलिसकेका अन्य थुप्रै खेलाडी पनि अस्ट्रेलिया जाने तयारीमा छन् ।

यसअघि आशिष लामा, दर्शन गुरुङ, सुमन लामा, सन्तोष तामाङ, नवीन गुरुङ, राजन गुरुङ, हेमन्त थापामगर लगायतले नेपाल छाडिसकेका छन् । पाकिस्तानसँगको खेल हुने टुंगो लागे राष्ट्रिय टिमका लागि प्रारम्भिक प्रशिक्षणमा कति जना बोलाउँने भन्ने जवाफसमेत एन्फासँग छैन । 

तीन वर्षपछि अन्तर्राष्ट्रिय फुटबलमा फर्किंदै पाकिस्तान, आठ वर्षपछि नेपालसँग खेल्दै
गएको जुन १ मा अन्तर्राष्ट्रिय फुटबलको सर्वोच्च निकाय फिफाको प्रतिबन्धबाट फुकुवा भएको पाकिस्तानले तीन वर्षपछि अन्तर्राष्ट्रिय खेल खेल्न लागेको हो । नेपालसँग भने पाकिस्तानले आठ वर्षपछि खेल्न लागेको हो । पछिल्लो पटक नेपालले सन् २०१३ मा घरेलु मैदानमा भएको साफ च्याम्पियनसिपमा पाकिस्तानसँग खेलेको थियो । यो खेल १–१ को बराबरीमा टुंगिएको थियो ।

पाकिस्तानले सन् २०१९ को जुनमा विश्वकप छनोटअन्तर्गत कम्बोडियासँग अन्तिम अन्तर्राष्ट्रिय खेल खेलेको थियो । फिफाले सन् २०२१ को मार्चमा तेस्रो पक्षको हस्तक्षेप भएको भन्दै पाकिस्तानलाई दोस्रोपटक प्रतिबन्ध लगाएको थियो । त्यसअघि सन् २०१७ मा पनि पाकिस्तानको फिफाको प्रतिबन्धमा परेको थियो ।