विराटनगर । कांग्रेस सभापतिसमेत रहेका प्रधानमन्त्री शेरबहादुर देउवाले गठबन्धनले कुनै पनि हालतमा जित्न आवश्यक रहेको बताएका छन् । शनिबार विराटनगरमा आयोजित सत्ता गठबन्धनको कार्यक्रममा देउवाले संविधानको रक्षाका लागि गठबन्धनको जित आवश्यक रहेको बताए ।

"गठबन्धनले जित्नु भनेको संविधानको रक्षा हुनु हो । हाम्रो उद्देश्य एउटै छ । कुनै शंका उपशंका छैन । कुनै पनि हालतमा हाम्रो गठबन्धनले जित्न आवश्यक छ," देउवाले भने ।

उनले लोकतन्त्रको रक्षाका लागि गठबन्धन भएको पनि बताए । उनले गठबन्धनका उमेदवारलाई अत्यधिक मतका साथ विजयी गराउन पनि आग्रह गरे ।

उनले एमाले अध्यक्ष केपी शर्मा ओलीले पनि गठबन्धन गरेको भन्दै उनलाई चुनावबाट जवाफ दिन कार्यकर्तालाई आग्रह गरे ।

"ओलीजीले पनि गठबन्धन गर्नुभएको छ त । उहाँले गठबन्धन गर्न हुने हामीले गर्न किन नहुने ? ओलीजी खाली गफमात्र गर्नुहुन्छ । काम गर्नुहुन्न," देउवाले भने ।

सत्ता गठबन्धनले देशका प्रमुख सहरमा चुनाव लक्षित कार्यक्रम गरिरहेको छ ।