काठमाडौं । नासा सेक्यूरिटीज कम्पनी (स्टक ब्रोकर नंम्बर ५८) ले नेपालमै पहिलोपटक लगानीकर्ताले सेयर ब्रोकरबाटै कर्जा लिएर सेयर खरिद गर्न सक्ने मार्जिन कारोबार सुविधा प्रदान गर्न गरेको छ । 

नेपाल स्टक एक्सचेञ्जले २०७५ सालमा मार्जिन कारोबार सुविधासम्बन्धी कार्यविधि, २०७५ जारी गरेपछि लगानीकर्तालाई औपचारिक रूपमा यस्तो सुविधा प्रदान गर्ने नासा सेक्युरिटिज पहिलो ब्रोकर कम्पनी बनेको हो । हालसम्म कुनै पनि ब्रोकरले यस्तो सुविधा प्रारम्भ गरेका छैनन् ।

नासा सेक्युरिटिजले नियमनकारी निकायहरूको मार्गनिर्देशन र मार्जिन कारोबार सुविधासम्बन्धी कार्यविधि, २०७५ बमोजिम लगानीकर्ताहरूका लागि दुई प्रकारका योजनाहरू ल्याएको छ । पहिलो योजनाअन्र्तगत १० लाखसम्मको पोर्टफोलियोमा काम गर्ने ग्राहकले ४० प्रतिशत मात्र नगद मार्जिन राखी कारोबार सुरु गर्न सक्नेछन् । 

यो योजना ३० दिने अवधिका लागि उपलब्ध गराइने बताइएको छ । उक्त योजनामा सेवा शुल्क र ब्याजसहित जम्मा शुल्क नौ हजार ९९९ रूपयाँ लाग्ने कम्पनीले जानकारी दिएको छ । दोस्रो योजना १० लाख रूपयाँसम्मको पोर्टफोलियोमा ५८ दिने अवधिका लागि हुनेछ । यसमा सेवा शुल्क र ब्याजसहित जम्मा शुल्क २१ हजार ५८ रुपैयाँ लाग्नेछ ।

यी सुविधा उपभोग गर्न चाहने ग्राहकले नेप्सेबाट जारी मार्जिन कारोबार गर्न योग्य कम्पनीको सूचीभित्र रही कारोबार गर्नुपर्नेछ । कम्पनीले दुवै योजना ग्राहकहरूले आवेदन दिएको ५८ मिनेट भित्रमा स्वीकृत गर्नेछ । 

कम्पनीसँग हाल उपलब्ध स्रोत धेरैभन्दा धेरै लगानीकर्ताहरूलाई सेवा प्रदान गर्ने उद्देश्यबाट परिचालन गरिएको कम्पनीले जानकारी दिएको छ । भविष्यमा धेरै स्रोतको जोहो गरी छिटो छरितो, गुणस्तरीय र भरपर्दो सेवा प्रदान गर्न कम्पनी प्रतिवद्ध रहेको बताइएको छ ।