काठमाडौं । पोखरामा जारी नवौँ राष्ट्रिय खेलकुद प्रतियोगिताअन्तर्गत महिला क्रिकेटमा सशस्त्र प्रहरी बल (एपीएफ)ले लगातार दोस्रो जित निकाल्ने क्रममा गण्डकी प्रदेशलाई नौ विकेटले पराजित गरेको छ ।

बिहीबार पोखरा रंगशालामा टस जितेर पहिले ब्याटिङ गरेको गण्डकीले १८.२ ओभरमा सबै विकेट गुमाएर २६ रन बनाएको थियो । २७ रनको लक्ष्य एपीएफले २.२ ओभरमा एक विकेट गुमाएर पूरा गर्‍यो ।

एपीएफकी ज्योति पाण्डेले दुई रन बनाउँदा कप्तान सीता रानामगरले अविजित १२ रन जोडिन् । इन्दु वर्मा नौ रनमा अविजित रहिन् ।

गण्डकीकी सृष्टि जैशीले एक विकेट लिइन् ।

त्यसअघि, पहिले ब्याटिङ गरेको गण्डकीका कुनै पनि खेलाडीले दोहोरो अंकमा रन बनाउन सकेनन् । गण्डकीका चार खेलाडीले रनको खाता खोल्न सकेनन् । सबैभन्दा धेरै रन बनाउने खेलाडीले पाँच रन जोडे ।

एपीएफकी इन्दुले दुई विकेट लिँदा सुमन विष्ट, नेरी थापा, निशा भट्ट र सीताले एक/एक विकेट लिए ।

जितसँगै एपीएफले समूह ‘ए’मा दुई खेलबाट चार अंक जोडेको छ । यो समूहमा सुदूरपश्चिम प्रदेश, मधेस प्रदेश र वाग्मती प्रदेशले समान दुई अंक जोडेका छन् । गण्डकी अंकविहीन छ ।

समूह ‘बी’बाट नेपाल पुलिसले सेमिफाइनलमा स्थान बनाइसकेको छ ।