काठमाडौं । आख्यान साधकहरूको सम्मानमा बाह्रखरी मिडियाले आयोजना गर्दै आएको डिशहोम १२खरी कथा लेखन प्रतियोगिता २०७९का विजेता तथा उत्कृष्ट कथाको संग्रह विमोचन यही कात्तिक ६ गते गरिने भएको छ ।

नेपाली आख्यान साधकहरूको सम्मान तथा आख्यान प्रतिभालाई प्रोत्साहन गर्ने क्रमलाई निरन्तरता दिँदै बाह्रखरी मिडिया प्रा.लि. अन्तर्गतको १२खरी बुक्सले चौथो ‘बाह्रखरी कथा लेखन प्रतियोगिता’ सम्पन्न गर्दैछ ।

नेपाली भाषामा लेखिएको कथाको खुला प्रतियोगितामा नेपालभित्र र संसारभरीबाट ५९६ कथाकारहरूले भाग लिएका छन् । 

यी कथाहरूमध्ये २५ उत्कृष्ट कथाहरूको संगालो प्रकाशन गर्ने र यिनै २५ मध्ये प्रथम, द्वितीय र तृतीय हुने कथाहरूलाई क्रमशः एक लाख, ६० हजार तथा ४० हजार नगद पुरस्कारले सम्मानित गरिने छ । यस पुस्तकमा अटाएका अन्य २२ प्रतिस्पर्धी कथाकारहरूले पनि रु. पाँच हजार तथा सम्मान पत्र प्राप्त गर्नेछन् ।

यस वर्षको कथा प्रतियोगितामा दुईवटा थप आकर्षण थपिएको छ । यसवर्ष देखि बाह्रखरीले नेपालको प्रतिष्ठित प्रकाशक फाइन प्रिन्टसँग सहकार्य गरेको छ । यसवर्षको उत्कृष्ट कथाको प्रकाशनको जिम्मेवारी फाइन प्रिन्टले लिएको छ । त्यस्तै यसवर्ष देखि नेपालका स्थापित वरिष्ठ पाँच कथाकारहरूको नयाँ कथा पनि सो कथा संग्रहमा समाविष्ट हुनेछन् । यसवर्ष बाह्रखरीका लागि नयाँ कथा लेखेर यो पुस्तकमा विशेष आकर्षण थप्ने वरिष्ठ कथाकारहरूमा डा. ध्रुवचन्द्र गौतम, माया ठकुरी, डा. बेन्जु शर्मा, अविनाश श्रेष्ठ तथा राजव छन् ।

यसवर्ष साहित्यकार तथा समालोचक प्रा.डा. कुमारप्रसाद कोइरालाको संयोजकत्वमा साहित्यकारहरू सगुना शाह र उमा सुवेदीसम्मिलित निर्णायक समूहले प्रथम तीनसहित उत्कृष्ठ २५ कथाहरूको चयन गरेका छन् । 

संसारभरी नेपाली कथा लेख्ने सबैका लागि खुलारूपमा आयोजित यसवर्षको कथा लेखन प्रतियोगितमा ५९६ नेपालीभाषी कथाकारहरूले कथा पठाएका थिए । बाह्रखरी मिडियाले सम्पूर्ण सहभागी कथाकारहरूप्रति विशेष आभार व्यक्त गरेको छ । 

पहिलो अंकदेखिनै यस प्रतियोगिताको प्रमुख प्रायोजक डिशहोम रही आएको छ । त्यस्तै अन्य प्रायोजकमा नेपाल इन्भेष्टमेन्ट बैंक र किया मोटर्स छन् भने अजोड इन्स्योरेन्स र सिटी एक्स्प्रेस मनि ट्रान्सफर सहप्रायोजक रहेका छन् । 

गत साउन १५ गतेदेखि भदौ १४ गते मध्यरातसम्मको समयसीमा तोकेर आह्वान गरिएको कथा लेखन प्रतियोगिताको चौथो संस्करणको नतिजाको मिति बाह्रखरीले पहिले तोकेको समयभन्दा करिब एक हप्ता पछि सरेको जानकारी दिँदै दसैं र डेंगी रोगको प्रकोपका कारणले यो ढिलाई हुन गएको मिडियाले स्पष्ट पारेको छ ।