काठमाडौं । काठमाडौंको हाँडीगाउँमा सत्यनारायण जात्रा मनाइएको छ । यो जात्रा 'कहीँ नभएको जात्रा हाँडीगाउँमा' भनेर प्रख्यात छ ।

ब्रह्मा, विष्णु र महेश्वर भगवानको पुजाआराधना गरी टोलटोलमा रथ घुमाएर काठमाडौंमा हाँडीगाउँको जात्रा मनाइएको हो । विशेष प्रकारको फूल र रथ परिक्रमा गरिने छुट्टै मौलिकता र विशेष पहिचान बोकेको हाँडीगाउँको जात्रा प्रत्येक वर्षको बडा दसैँको कोजाग्रत पूर्णिमाको भोलिपल्ट काठमाडौंको हाँडीगाउँमा मनाइँदै आएको छ ।

यस वर्ष पनि जात्रालाइ निरन्तरता दिने क्रममा उल्लासमय वातावरणमा त्‍यहाँका युवाहरूले खटमा चढेर जात्रा मनाएका छन । हाडीगाउँमा निकालिएको जात्रा हेर्न सर्वसाधारणहरूको भिड लागेको छ ।

विश्वकर्माले बनाएका यी त्रिदेवको एकैपटक दर्शन र पूजाका साथै जात्राको दर्शन गर्नाले घरमा महालक्ष्मीको बास र मनोकामना पूरा हुने जनविश्वास छ । जात्राका दिन दर्शन र पूजाका लागि तीनवटै रथ तीनवटा भिन्न चोकमा राख्ने र घरघरबाट आएर पुजा गर्ने चलन छ ।  

अन्य जात्रामा माथि गजुर र तल भगवानको मूर्ति अर्थात आकृति हुन्छ भने हाँडीगाउँको जात्रामा यसको ठिक उल्टो अर्थात तल गजुर र माथि देवताको मूर्ति राखिन्छ । यो जात्रा तीन दिनसम्म यो जात्रा मनाउने गरिन्छ । खटको गजुर उल्ट्याइ देबतालाई माथि राख्ने, मैनको फुल प्रयोग गर्ने चोक्ते नारायण जात्रालाई नै जनजिब्रोमा हाडीगाउँको जात्रा भनिएको हो ।

परापूर्वकालमा त्यहाँकी राजकुमारीले सत्यनारायणको अपहेलना गरेका कारणले १२ वर्षसम्म सुत्केरी हुन नसकेको र यो जात्रा गरेपछि राजकुमारी सुत्केरी भएको विश्वास रहँदै आएको छ ।

पूर्णिमाको भोलिपल्ट मूर्तिलाई नगर घुमाई जात्रा सम्पन्नसँगै हाँडीगाउँमा दसैँको पनि सकिन्छ ।

तस्बिरहरू : सुनिल प्रधान र अभिषेक महर्जन/बाह्रखरी