काठमाडौं । बडादसैँको अवसरमा खाद्य व्यवस्था तथा व्यापार कम्पनी लिमिटेडले स्थापना गरेको सुपथ मूल्य पसलबाट खसी, बोका तथा च्यांग्राको बिक्री वितरण सुरु भएको छ । 

खाद्य व्यवस्था तथा व्यापार कम्पनी लिमिटेडको काठमाडौं थापाथलीस्थित वाग्मती प्रादेशिक कार्यालयबाट बुधबारदेखि खसी, बोका र च्यांग्राको बिक्री वितरण सुरु भएको हो । 

कम्पनीसँग एक हजार खसी, बोका र २०० वटा च्याङ्ग्रा रहेकोमा बिहीबार दिउँसोसम्ममा ३०० वटा खसी बोका र १०० वटा च्याङ्ग्रा बिक्री भइसकेको खाद्य व्यवस्था तथा व्यापार कम्पनी लिमिटेड वाग्मती प्रादेशिक कार्यालयकी प्रमुख ज्ञानु थापाले जानकारी दिइन् । 

प्रमुख थापाले खसी, बोका बिक्री वितरण गर्दा पशु चिकित्सकले चेकजाँच गरेर मात्रै स्वस्थ खसी, बोका बिक्री वितरण गरिरहेको बताइन् । उनले खसी, बोका तथा च्यांग्रा बजार मूल्यभन्दा सस्तो गरी बिक्री भइरहेको पनि उल्लेख गरिन् । थापाथलीस्थित प्रादेशिक कार्यालयमा उपभोक्ताको चाप रहेको उनको भनाइ छ ।

कम्पनीले असोज १ गतेदेखि ४१ जिल्लाका ४५ स्थानबाट सहुलियत मूल्य पसल सञ्चालन गरिरहेको छ । बिक्री कक्षमा नपुगेका उपभोक्ताहरुका लागि सहकारी डिलर लगायतका माध्यमबाट उपभोक्ताका घर घरमा उपभोग्य सामग्री पु¥याएको थापाको भनाइ छ । 

विभागले १० रुपैयाँ छुटसहित जिउँदो खसी प्रतिकिलो ६७० रुपैयाँ, जिउँदो बोका प्रतिकिलो ६७० रुपैयाँ र जिउँदो च्यांग्रा १ हजार २५० रुपैयाँमा प्रतिकिलो बिक्री गरिरहेको छ ।