काठमाडौं । मंसिर ९ देखि १७ गतेसम्म दोस्रो नेपाल अन्तर्राष्ट्रिय नाटक महोत्सव हुने भएको छ । दोस्रो नेपाल अन्तर्राष्ट्रिय नाटक महोत्सव २०२२ मा १६ देशका २३ वटा नाटक महोत्सवमा मञ्चन हुनेछन् । 

दोस्रो नेपाल अन्तर्राष्ट्रिय नाटक महोत्सवमा मण्डला थिएटरको ठूलो हल र केही नाटक बाहिरी परिसरमा मञ्चन हुनेछन् । दोस्रो नेपाल अन्तर्राष्ट्रिय नाटक महोत्सवमा २०० कलाकारको सहभागिता रहने र त्यसमध्ये १३० जना राष्ट्रिय र बाँकी अन्तर्राष्ट्रिय कलाकार रहनेछन् । 

आज भएको पत्रकार सम्मेलनमा रंगकर्मी दयाहाङ राईले नेपालमा नाटक महोत्सव गर्न जरुरी रहेका कारण यो महोत्सव सुरु गरेको बताए । उनले अबको जिम्मेवारी आफूहरुको नै रहेकाले नाटकको माध्यमबाट नेपाललाई विश्वभर चिनाउनुपर्ने बताए । 

आफू सामाजिक रुपमा तयार रहे पनि आर्थिक रुपमा कठिनाइ रहेको उनले बताए । 

निर्देशक एवं रङ्गकर्मी अनुप बरालले आफूलाई रङ्गकर्मको नोकर भएर बाँच्न मन लाग्ने बताए । उनले महोत्सवलाई सम्पूर्ण रङ्गकर्मीहरूको साझा महोत्सवको रुपमा लिनुपर्ने बताए । 

यस वर्ष ‘सामाजिक रुपान्तरणको लागि रंगमञ्च, विविधताको उत्सव’ भन्ने नारासहित दोस्रो नेपाल अन्तर्राष्ट्रिय नाटक महोत्सव मनाउने आयोजकले बताएको छ ।