काठमाडौं । भारतीय कमेडियन राजु श्रीवास्तवको ५८ वर्षको उमेरमा बुधबार बिहान नयाँ दिल्लीमा निधन भएको छ । भारतका प्रख्यात कमेडियन राजु श्रीवास्तव हास्यव्यंग्य जगतका एक सुप्रसिद्ध नाम थिए । 

अगष्ट १० तारिखका दिन हार्ट अट्याक भएर दिल्लीको एम्स अस्पतालमा भर्ना भएका श्रीवास्तवलाई भेन्टिलेटरमा राखेर उपचार गरिएको थियो । बीचमा उनी होसमा आएर १५ दिनपछि भेन्टिलेटरबाट बाहिर पनि निकालिएका थिए । तर, सेप्टेम्बरको पहिलो दिन उनलाई ज्वरोले समातेको र त्यसपछि पुनः भेन्टिलेटरको सहयोगमा रहेका थिए । 

श्रीवास्तव भारतीय हास्यव्यंग्य क्षेत्रमा सन् १९८० देखि नै कार्यरत रहे पनि उनको प्रतिभाको परिचय भने सन् २००५ को स्ट्यान्डअप कमेडी शो ‘द ग्रेट इन्डियन लाफ्टर च्यालेन्जदेखि सर्वसाधारणमा फैलिएको थियो । 

उनले बलिउडका ‘मैने प्यार किया’, ‘बाजिगर’ जस्ता सिनेमामा अभिनय पनि गरेका थिए ।