काठमाडौं । महिन्द्रा इलेक्ट्रिक मोबिलिटी लिमिटेडले ट्रियो नामक लिथियम–आइओन सञ्चालित इलेक्ट्रिक थ्री–ह्विलर ट्रियो इलेक्ट्रिक अटो सुर्खेतमा पनि सार्वजनिक गरेको छ ।

महिन्द्रा ट्रियो पूर्ण निर्माण युनिट (सीबीयू) संरचनाको माध्यमबाट नेपाल आउने गर्दछ । यो गाडी महिन्द्राको भारतको बेंगलुरुस्थित फ्याक्ट्रीमै निर्माण भइरहेको छ । 

अग्नि इनर्जीले नेपालको विभिन्न ठाँउमा ट्रियो बिक्री गर्दै आएको छ । पेट्रोल अटोको तुलनामा महिन्द्रा ट्रियोमा ग्राहकले वार्षिक २ लाख रुपैयाँ बचत गर्नसक्ने कम्पनीले दाबी गरेको छ । महिन्द्रा ट्रियो १० हजारभन्दा बढीे बिक्री भएको छ ।

नेपाल सरकारले विद्युतीय सवारी साधनको प्रवद्र्धन गर्दै आएकाले विद्युतीय थ्री व्हिलर सवारी साधनको शुभारम्भ गर्ने सही समय भएको कम्पनीले जनाएको छ । परम्परागत पेट्रोल अटोको तुलनामा ठूलो बचतसँगै आफ्नो स्वमित्वकर्ताको जीविकामा उल्लेखनीय रूपमा वृद्धि गर्ने कम्पनीले दाबी गरेको छ ।

ट्रियोमा जस्तोसुकै कच्ची सडकमा पनि आरामदायी सवारीका लागि अगाडि हाइड्रोलिक सक एब्जर्भर र पछाडि लिफ स्प्रिङको प्रयोग गरिएको छ । यस सवारी साधनमा राम्रो रोक्ने शक्ति भएको हाइड्रोलिक ब्रेक पनि उपलब्ध रहेको छ ।

पूर्ण रूपमा डिजिटल यान्त्रिक कन्सोलले चार्जको अवस्था (स्टेट अफ चार्ज–एओसी), गाडी चलाउने दायरा, गति, ड्राइभ मोड संलग्नता र अन्य विभिन्न सूचनाहरूको विस्तृत जानकारी लिन सकिने कम्पनीले जनाएको छ ।

पेट्रोल थ्री व्हिलरको तुलनामा बढी बचत गर्ने, उत्कृष्ट पर्फेमेन्स, उन्नत लिथियम आयोन ब्याट्री, थकानमुक्त ड्राइभिङ अनुभव, आकर्षक डिजाइन, विद्युतीय अटोमोबाइल उद्योगमै–पहिलो कनेक्टेड नेमो  मोबिलिटी प्लेटफार्म लगायतका विशेषता रहेको कम्पनीले जनाएको छ ।

यसका साथैं टेलिमेटिक्स इकाई र जीपीएस, विन्डस्क्रिन र वाइपिङ सिस्टम, स्पेयर व्हिलको व्यवस्था रहेको छ ।