बुटवल । सीमावर्ती भारतीय बजारमा खरिद गर्न जाने नेपाली ग्राहकलाई रोक्न भैरहवामा दसैँ सस्तो बजार सञ्चालन हुने भएको छ । सिद्धार्थ उद्योग वाणिज्य संघ रूपन्देहीको आयोजनामा असोज ११ गतेदेखि १४ गतेसम्म बजार सञ्चालन हुने भएको हो ।

नेपालीहरूको चाडमा आम उपभोक्तालाई स्वदेशी बजारमा खरिद गर्ने बानीको विकास गराउने उद्देश्यका साथ सस्तो बजारको आयोजना गरिएको संघका अध्यक्ष भीष्म न्यौपानेले जानकारी दिए । स्वदेशी तथा गुणस्तरीय वस्तु तथा सेवाहरूबारे उपभोक्ताहरूलाई सचेतना गराउने बजारको उद्देश्य रहेको उनको भनाइ छ । 

विभिन्न उद्योगी, व्यावसायीहरूसँगको सहकार्यमा उपभोक्ताहरूलाई सर्व शुलभ रूपमा एकै थलोबाट सहज तरिकाले दैनिक उपभोग्य वस्तुहरू बिक्री वितरण गरिने कार्यक्रम संयोजक अर्जुन कार्कीले बताए ।

चार दिनको बजारबाट भैरहवा बजारमा आर्थिक चलायमान हुने, स्वदेशी उद्योग व्यवसायका उत्पादनहरूको प्रचार प्रसार हुने र आम उपभोक्ताहरूले सर्व शुलभ रूपमा उपभोग्य वस्तुहरू खरिद गर्ने अवसर प्राप्त गर्ने कार्कीको भनाइ छ ।

विभिन्न उद्योग तथा व्यापारिक प्रतिष्ठानहरूको सहभागिता रहने दसैँ बजारमा साल्ट ट्रेडिङ सहित खाद्यन्न, जुत्ता, चप्पल, दुई पाङग्रे अटोमोबाईल सहितका १५ देखि १७ वटा स्टलहरू रहने उनले जानकारी दिए